بلوچستان ءَ ایٹمی بم ءِ چکاس ءَ پد ودی بیوکیں تابکاری ءُ آئی ءِ آسر ءَ نادْراھیانی گر ءُ دار ءَ پاکستانی مھترھند ءَ گامگیج نہ زرتگ پرچا کہ پاکستان بلوچ ءِ مھترھند نہ اِنت بلکیں زورگریں مھترھندے۔
اے سسایانی درانگازی ماں بی این ایم ءِ شھید راشد مشکے- آواران ھنکین ءِ مراگشے ءَ تْران کنان گْوشتانکیاں گْوشتگ اَنت۔اے مراگش 28 مئی 1998 ءَ بلوچستان ءَ بیوکیں ایٹمی بم ءِ چکاسانی بلوچستان ءِ سر ءَ تابکاری ءُ سیاسی سانانی بنگپ ءَ برجم دارگ بیتگ اَت۔
مراگش ءِ گچینی ئیں مھمان بی این ایم ءِ سرکارگشاد دل مراد اَت ، بنجاھی پتر ءِ باسک چیپ اسلم ، ھنکین ءِ کمک سرکماش تلار ، ھنکین ءِ کلیتدار میرک ءُ شھیدمنان بنزہ ءِ کارگشاد ریھان ءَ ھم ھمے مراگش ءَ گپ جتگ۔
ھمے بنگپ ءَ شھید انور ایڈوکیٹ کیچ۔ گوادر ھنکین ءَ ھم مراگشے برجم دارگ بیتگ ، آ مراگش ءَ بی این ایم ءِ کستریں کمک سرکارگشاد ھسن دوست ءَ ایٹمی تابکاری ءِ بلوچستان ءِ سر ء سانانی درگت ءَ وتی سسایانی درانگازی کرتگ۔
آئی ءَ گْوشتگ 26 سال گْوزگ ءَ پد راسکوہ ءُ چپ ءُ چاگرد ءِ میتگانی مردم جیڑھانی دیمپان اَنت۔ پوست ءُ ھون ءِ شیمک ( کینسر) گیش بیتگ۔اے چکاساں پیش شیمک ءِ بارہ ءَ کم اش کنگ بیتگ اَت نی ھرچ سال دھاں مردم اے نادْراھی ءِ آماچ بیت ءُ مر ایت۔
گْوشتانکیاں گْوشتگ ، بلوچ راج ءِ بگیری ءَ پاکستان ھرچ وڑیں رپک ءُ ھنر کنگ ءَ اِنت ؛ نشہ ءِ تالانی ، ناوانندگی ، مردماں چہ وتی ھلک ءُ ھنداں لڈینگ۔ مروچی پاکستان گوں چین ءَ ھمدست اِنت ءُ گوں بلوچ راج ءَ ناروائی کنگ ءَ اِنت۔ڈیرہ بگٹی ، ریکوڈک ءُ گوادر ءَ مڈیانی لٹ ءُ پل برجاہ اِنت ءُ بلوچ بدتریں جاوراں زند گوازینگ ءَ اَنت۔بلوچ راج زیردست کنگ ءُ چہ وتی جند ءِ سرڈگار ءِ واک ءُ واکداری ءَ زبھر کنگ بیتگ۔
آئی ءَ گْوشتگ ایوک ءَ گوں وشیں اوگام ءُ وژدلیں گپاں مٹی نئیت۔مارا پہ وت ءُ پہ وتی آیوکیں پدریچانی وشھالی ءَ ماں آزاتی ءِ جھد ءَ دیمونی دیگی اِنت ءُ راجی ادارہ مھکم کنگی اَنت۔ھرچ جھدکار ءَ وتی زانت ءُ زانگ ءُ بودشت ءِ رد ءَ پہ وتی راجی من ءُ مولاں کار کنگی اِنت۔مئے مھر ، مئے ھم سنتی پہ وتی گلزمین ءُ پہ وتی راجی سیاسی کارکنان بیگ لوٹ اَنت ءُ مئے کینک ءُ کست ءُ نادوستی پہ بلوچ راج ءِ بدواھاں بہ بہ اَنت ، چہ ایشی ءَ ما پہ وتی مول ءَ سوبمند بہ ایں۔
