گوادر: زورگریں پاکستانی لشکر ءِ دست ءَ زور بیگوہ کنگ بوتگیں بلال رزا مھمد ءِ کھول ءَ آئی یل نہ کنگ ءِ بگیری ءَ زھرشانی ءَ سربندن دوراھی ءَ سی پیک دگ بند کرتگ۔ زھرشانی ءَ مردماں بازیں کچے ءَ بھر زرتگ ۔ دگ ءِ بند بوگ ءِ سوب ءَ دوئیں نیمگاں گاڑیانی مزنیں کتار اوشتاتگ اَنت۔
زھرشانی کنوکیں مردمانی گوشگ اِنت کہ بلالءِ زوریں بیگواھی ءَ ماھے گیش روچ گوستگ بلے انگت ءَ آئی ھچ وڑیں ھال نیست۔ ما پہ آئی آجوئی ءَ ھمک در ٹک اِتگ بلے ھچ جاہ ءَ مئے گپ گوش دارگ نہ بوتگ۔ دانکہ بلال آجو نہ بوتگ ما وتی زھرشانی ءَ برجاہ دار ایں۔
آیاں گوں بلوچ یکجھتی کمیٹی ءِ باسک، زور بیگواھیں مردمانی کھولاں ھوار جتائیں بھرگاں سیادی داروکیں مردماں لوٹ کرتگ ءُ گوشتگ کہ بیا اَنت ءُ پہ بلال ءِ آجوئی ءَ مئے گون ءَ کمک بہ کن اَنت۔
انچوش گوشگ بوگ ءَ اِنت کہ اے وھد ءَ پولیس کارمند بازیں کچے ءَ آتکگ ءُ زھرشانی جاہ ءَ مچ بوگ ءَ اَنت ھمے گمان کنگ بیت کہ پولیس پہ زور زھرشانی ءَ ھلاس کنگ لوٹ ایت۔
