کراچی: بلوچ یکجکھتی کمیٹی ءِ سروک ڈاکٹر ماہ رنگ ءَ ماں کراچی پریس کلب ءَ پریس کانپریس کرتگ ءُ گوشتگ کہ بلوچ یکجھتی کمیٹی گوستگیں چنچو سال اِنت بلوچ چکچینی ءِ بگیری ءَ جھد کنگ ءَ اِنت ءُ پاری بلوچ یکجھتی کمیٹی ءَ بلوچ چکچینی ءِ بگیری ءَ یک مھکم ءُ چہ بلوچستان ءِ انوگیں گوستانک ءِ درساں مستریں سیاسی زرمبشتے برجم داشتگ۔ چہ تربت ءَ بگر داں اسلام آباد ءَ یک دراجکشیں روانکے کش اتگ۔ اسلام آباد ءَ سر بوگ ءَ پد یک دراجکشیں نندانکے برجاہ داشتگ ءُ واتر شال ءَ آتکگ یک مزنیں مچی یے برجم داشتگ۔ بلوچ یکجھتی کمیٹی ءَ بلوچانی سرجم ءَ کمک ءُ پلہ مرزی گوں اِنت ءُ چہ بنداتی روچاں بلوچستان ءَ پہ مردمی ھکانی لگتمالی ءَ جھد کنگ ءَ اِنت۔ بلوچ یکجھتی کمیٹی چہ وتی جھد ءِ بنداتی روچاں پر ایمن اِنت ءُ مئے روانک، نندانکءُ مچی ءِ وڑیں مزنیں پروگرامے ءَ یک دمانے ءَ ھم زوراکی کنگ نہ بوتگ۔ بلے چہ ایشی ءَ ابید مئے باسک ءُ دوزواھاں ءُ گوں زرمبشت ءَ ھمگرنچیں ھمبل مدام بیھار دیگ، زوراکی، دزگیری، دروگیں کیس ءُ لٹ شاپانی دیمان بوتگ اَنت۔
آئی ءَ گوشتگ کہ من مرچی چہ پریس کانپریس ءِ رد ءَ دو گپ تچک کنگ لوٹ آں کہ ما چہ ریاست ءِ درسیں زوراکیاں، دزگیری، زوریں بیگواھی، دروگیں ارزی، بیھار ءُ ترسینگ ءَ ابید یک دمانے چہ وتی جھد ءَ پد کنز نہ بہ ایں ءُ بلکیں گیش مھکمیں وڑے ءَ بلوچ چکچینی ءِ بگیری ءُ بلوچ راجی ھکانی دیمپانی ءَ جھد کن ایں۔ دومی گپ ایش اِنت کہ ریاست ءَ درسیں وھد ءَ پہ مئے دلسیاہ کنگ ءَ مدام زوراکی کنگ ءِ جھد کرتگ۔ بلے ما زمہ وار ءُ مھکمیں سیاسی گلے ءِ پیم ءَ وتی گل ءِ زرمبشتی مول، راھبندانی پارست ءَ زانشت ءِ بنیاد ءَ جھد کنگ ءَ ایں۔ ما ھچ وڑ ءَ دگہ پژدرے ءِ بنیاد ءَ سیاست ءُ جھد کنگ ءَ نہ ایں نہ ھم دیم ءَ کن ایں۔ پمیشکا ریاست مئےھلاس کنگ ءِ وتی بے سوبین جھد ءَ ھلاس بہ کنت۔ ما چہ ایشیءَ ابید اے درس تچک کرتگ اَنت ءُ وتی گل ءِ بگیری ءَ انوگیں بوتگیں ریاستی درسیں زوراکی ءُ راھبند ءُ کانود ءِ لگتمالی میان استمانی درسیں ادارہ ءُ اھوالکار سرپد کرتگ اَنت کہ اگاں مئے باسک ، ھمدرد ءُ گوں زرمبشت ءَ بندوکیں ھمبلاں کسے ءَ چونیں تاوانے بوت ایشی درسیں زمہ واری ریاست ءِ سر ءَ اَنت۔ پمیشکا کہ ریاست یک زمہ واریں ریاستے ءِ زمہ واریاں پیلو بہ کنت ءُ وتی راھبند ءُ کانود ءِ شرپ ءَ بہ کنت۔ راجمستری ءُ سیاسی جھد ءَ بہ من ایت ءُ بلوچستان ءَ ھر پیمیں مردمی ھکانی پادمالیاں زوت ھلاس بہ کنت۔
ڈاکٹر ماہ رنگ ءَ گوشتگ کہ بلوچ یکجھتی کمیٹی ءِ بنجاھی آرگنائزنگ باڈی ءِ نیاد کراچی ءَ برجم دارگ بوتگ ، اے نیاد ءَ بلوچستان ءِ سیاسی جاور، ریاست ءِ بلوچ چکچینی، بلوچ چکچینی ءِ بگیری ءَ بوتگیں روانک ءَ پد بلوچستان ءِ جاور، سیاسی گلانی لوٹ ءُ ارزیشت ءُ بلوچ یکجھتی کمیٹی ءِ گل ءِ راھبند ءِ سر ءَ سرجم ءَ گپ ءُ تران ءَ پد بلوچ یکجھتی کمیٹی ءِ آرگنائزنگ باڈی جوڑ کنگ بوتگ۔ ایشی بنجاھی سرکماش من ماہ رنگ ءُ کمک سرکماش لالا وھاب گچین کنگ بوتگ۔ دیوان ءَ بنجاھی آرگنائزنگ باڈی ءِ جوڑینگ ءِ ھواری ءَ گل ءِ راھبند ءُ منشور ھم منگ بوتگ اَنت ءُ گوں ایشی ھواری ءَ بنجاھی آرگنائزنگ باڈی جوڑ کنگ بوتگ۔ گل ءِ بنجاھی پتر ءَ جتائیں بھرگ ھوار کنگ بنت کہ آ بلوچ چکیچینی ءِ بگیری ءَ زرمبشت ءَ مھکم بہ کن اَنت ، بلوچاں یکجاہ بہ کن اَنت، بلوچ چاگرد ءِ تہ ءَ جتائیں سیاسی ءُ چاگردی توانمندانی میان ءَ ھم سنتی ودی بہ کن اَنتءُ پہ گل ءِ مھکم کنگ ءَ کار بہ کن اَنت۔
آئی ءَ گوشتگ کہ ما اے پریس کانپریس ءِ رد ءَ بلوچ راج ءُ گل ءِ دوزواھاں سرپد کن ایں کہ بلوچ یکجھتی کمیٹی ءَ باسک ءِ زورگ بندات کرتگ شما پہ بلوچ یکجھتی کمیٹی ءَ ھوار بوگ ءَ وتی ھندانی بلوچ یکجھتی کمیٹی ءِ سروکانی گون ءَ رھوت بہ کن اِت ءُ چہ ایشی ءَ ابید گوں بلوچ راج ءِ ھمک بھرگاں سیادی داروکیں مردماں لوٹ کن ایں کہ آ بلوچ یکجھتی کمیٹی ءِ بلوچ چکیچنی ءِ بگیری ءَ برجاھیں زرمبشت ءَ ھر وڑیں کمک کنگ ءَ وتی راجی زمہ واریان پیلو بہ کن اِت۔
