بلوچ راجی زْرمبشت ( بی این ایم ) ءِ مردمی اگبالانی تْرامگیج ’ پانک‘ ھمک ماہ ماں بلوچستان ءَ گوں سرجمیں نام ءُ نشاناں مردمی اگبالانی گزارش ءَ پیش کنت۔مئی 2024 ءِ گزارش ءَ زور بیگواھیاں ابید درآمیدگسی کوش، زور بیگواھیں مردمانی سر ءَ دروگیں کیس ءُ دگ ویلانی بنگپ ھوار کنگ بیتگ اَنت۔
پانک ءِ گزارش ءِ رد ءَ پاکستانی لشکر ءُ گوں آئی ءَ بندوکیں مردم کشیں رمب ءِ چیرکاں سئے کس کشتگ۔کشگیں بیتگیں مردم ، زاھد نیاز کندری مشکے ءِ نندوک ، بالاچ نزیر اھمد نوشکے ءِ نندوک ءُ یار مھمد ء جلال نسیر آباد ءِ نندوک اَت۔
پانک ءِ گزارش ءِ رد ءَ چہ بلوچستان ءُ کراچی ءَ 90 کس پاکستانی لشکر ءَ زور بیگواھیانی نشانگ کرتگ۔ 19 زور بیگواہ چہ آزارجاھاں یلہ کنگ بیتگ۔ آیانی ناراھیں دزگیری، زندان ءُ آیاں لٹ ءُ کٹ کنگ ءِ سر ءَ چہ مھترھندی تْرامگیجانی نیمگ ءَ ھچ گْوشگ نہ بیتگ ءُ ناں کہ چوش زانگ بیتگ کہ زور بیگواھی ءِ آماچیں مردمانی یلہ بیگ ءَ پد ھوش ءُ سما ءُ جان ءُ اندام چون اَنت، اے بارہ ءَ ھچ سرپدی نیست۔
چہ پانک ءِ نیمگ ءَ گْوشگ بیتگ مئی 2024 ءَ چہ کیچ ءَ 22 ، چہ گوادر ءَ 15 ، چہ آواران ءَ 9 ، چہ ڈیرہ بگٹی ءَ 29 ، چہ مچ ءَ 2 ، چہ نصیرآباد ءَ 2 ، چہ کزدار ءَ 2 ، چہ شال ءَ 3 ، چہ ڈیرہ گازی ھان ءَ 2 ، چہ نوشکے ءَ 2 ، چہ پنجگور ءَ یکے ءُ چہ کراچی ءَ یک مردمے درآمیدگسی دزگیری ءَ پد زور بیگواہ کنگ بیتگ اَنت۔
’ در آمیدگسی کوش ، زور بیگواھیانی درسیں جیڑھانی سر ءَ پاکستانی توان چہ آمیدگس ءِ نیمگ ءَ جست ءُ پرس ءُ گر ءُ دار بہ بہ اَنت۔‘
پانک ءَ زور بیگواھیں مردمانی بگیری ءَ دروگیں کیسانی نیمگ ءَ دلگوش پرینگ ءُ گْوشگ بیتگ کہ پاکستانی لشکر مردماں زور بیگواہ کنگ ءَ پد آیانی سر ءَ دروگیں کیس جنگ ءَ اِنت چہ ایشی ءَ سانمند بیتگیں مردم ءُ آیانی کھولاں آزار رسگ ءَ اِنت۔
پانک ءِ رد ءَ ’ اے کار نامزدگری ( ناانصافی ) اِنت، کہ سانمندیں مردم ایشی ءِ دیمپان اَنت۔‘
مئی ءَ سئے کسانی دروگیں کیساں دزگیری منگ بیتگ۔چہ ایشاں نیاز ابدللہ ءُ بشیر ابدل گنی ھوار اَنت کہ سربندن ، گوادر ءَ ھپت کسانی کوش ءِ بھتام ءَ پولیس ءِ دست ءَ دیگ بیتگ اَنت وھدے کہ اے مردم چہ ایشی ءَ پیش مھترھندی توانانی دست ءَ بیتگ اَنت۔
ھمے پیم پیسل سوالی ھم زور بیگواھی ءَ پد ناشرکاری ءِ بھتاماں پولیس ءِ دست ءَ دیگ بیتگ۔
’ اے کار ءُ کردگار زور بیگواھیں مردماں گیشتر سانمند کنت ، ھمے کار راھبند ءِ واکداری ءُ ماں بلوچستاں ءَ مردمی اگبالانی جاور ءِ سر ءَ بے تاھیری ودی کنگ ءَ اِنت۔‘
پانک ءَ بلوچستان ءَ گیش بیوکیں دگ ویلانی سر ءَ بے تاھیری درشانتگ ، بلوچستان ءَ دگانی نزوری ، دگانی سر ءَ پھریزی گامگیج ، دگانی سر ءَ پہ پھریز ءَ نشان ءُ سوجانی نہ بیگ ءُ یک روئیں شھدگانی برپشت ءَ ویل گیش بیگ ءَ اَنت۔
’ پہ شھدگ جوڑ کنگ ءُ آیانی گھتری ءَ زر ھرچ کنگ بہ بیت ، داں چد ءُ دیم ویل ءُ مرک ءُ میرانی دیم دارگ بہ بیت۔‘
پانک ءَ میان استمانی تْرامگیجانی کردار ءِ گھتر کنگ ءَ یک برے پد ءَ لوٹ کرتگ ، مردمی اگبالانی میان استمانی گلانی چارگزاری ءُ بلوچستان ءَ مردمی اگبالانی گزارش ءِ رد ءَ اے ناگیگیں جیڑھانی تہ ءَ گھتری اتک کنت۔ اے کار سانمند بیتگیں مردم ءُ پہ آیانی کھولاں مزدانک رسگ ءِ دلجمی ءِ برپشتی بیت۔
