پنجاپ: بلوچ نودربر انیس ءُ پاروک ءَ ھوار آدگہ نودربرانی زوریں بیگواھی ءِ بگیری ءَ بھاولپور پریس کلب ءِ دیم ءَزھرشانی کنگ بوتگ۔ زھرشانی ءَ نودربراں بازیں کچے ءَ بھر زرتگ ءُ بیگواھیں نودربرانی آجوئی ءِ لوٹ اِش کرتگ۔
آیاں تران کرتگ ءُ گوشتگ کہ مرچی پہ بلوچ ءَ ھما جاور آتکگ اَنت کہ بلوچ ھرکج ءَ بیت آ پھریز نہ اِنت۔ بلوچ بلوچستان ءَ بہ بیت یا چہ بلوچستان ءَ ڈن ھم نشانگ کنگ بیت۔ انوگیں روچاں چہ شال ءَ بگر داں پنجاپ ءَ مئے باز بلوچ نودربر بیگواہ کنگ بوتگ اَنت۔
آیاں گوشتگ کہ ھمے زوریں بیگواھی ءُ زوراکیانی بگیری ءَ چہ کیچ ءَ زھرشانی روانکے در کپ ایت ءُ داں شال ءُ پد ءَ اسلام آباد ءَ سر بیت۔ بلے اسلام آباد ءَ مئے مات ءُ گھار زندانی کنگ بنت۔ مئے بیست ءُ پنچ نودربر آوار جنگ ءُ داں چار ءُ پنچ روچاں بیگواہ کنگ بیت۔
آیاں گوشتگ کہ ھمے ڈیھ ءِ کانود کدی ھم اے موکل ءَ نہ دنت کسے آوار جنگ ءُ بیگواہ کنگ بہ بیت، بلے 2012 ءَ توتک ءِ تہ ءَ سئیسد بیگواھیں مردمانی لاش چہ مچی مانشجاھاں دزکپ اَنت۔ اے لاش مارا ھما ادارھاں داتگ اَنت کہ آیان ءَ بلوچ نہ بلکیں بلوچستان لوٹ ایت۔
آیاں گوشتگ کہ انوں ھزارانی کچ ءَبلوچ ءِ پسگ چیریں آزارجاھاں بندیگ اَنت آیانی باروا کس سرپد نہ اِنت۔ ھما لاش کہ چہ توتک ءَ دزکپتگ اَنت آیاں کس نزانت کہ کئی بوتگ اَنت۔ چنچو کھول پہ وتی زور بیگواھیں آزیزاں رنجانی دیمپان اَنت۔
