شال: بلوچ نودربر سروک زاکر مجید ءِ زوریں بیگواھی ءِ پانزہ سال سرجم بوگ ءَ کھول ءِ نیمگ ءَ زھرشانی روانکے کشگ بوتگ۔ زھرشانی روانک ءَ زور بیگواھیں مردمانی کھول، بلوچ یکجھتی کمیٹی ءِ سروک ءُ باسک، نودربر، سیاسی ءُ چاگردی گلانی باسک ءُ لس مردماں بازیں کچے ءَ بھر زرتگ۔
زھرشانی کنوکیں مردماں زور بیگواھیں مردمانی اکس، بینر ءُ پلےکارڈ دستاں بوتگ اَنت کہ آیاں زوریں بیگواھیانی بگیری ءَ اوگام جتگ ءُ درسیں زور بیگواھیں مردمانی آجوئی ءِ لوٹ کرتگ۔
زھرشانی ءَ زور بیگواھیں زاکر مجید ءِ مات ءَ تران کرتگ ءُ گوشتگ کہ ریاست ءَ کجام میار ءَ زاکر جان ءَ آوار جتگ ءُ آئی چماں پٹی بستگ ءُ بیگواہ کرتگ بلے اے گپ داں مروچی ءَ ھم من ءَ گوشگ نہ بوتگ۔ پاکستان ءِ تہ ءَ انگت ءَ چوشیں کانود نیست کہ یک نیزگاریں ماتے ءِ کمک ءَ بہ کنت۔ من پہ انساپ ءَ ھمک در ٹک اتگ۔
دیمتر ءَ مردماں تران کرتگ ءُ گوشتگ کہ زاکر مجید ءَ ھوار آدگہ نودربر ءُ ورنا ھزارانی کچ ءَ بلوچ ریاست ءِ دست ءَ آوار جنگ ءُ بیگواہ کنگ بوتگ اَنت اے پہ مئے آھوکیں پدریچ ءَ یک کلوھے۔ ریاست بلوچانی سر ءَ سے رنگ ءَ زوراکی کنگ ءَ اِنت، یکے آئی سرڈگار دستیگ کرتگ،دومی اے سرڈگار ءِ پسگ چہ سالاں زنداناں بندیگ کرتگ اَنت، چہ زنداناں ابید اگاں کسے ءَ وانگ لوٹ اتگ گڑا نشہ آماچ کنگ بوتگ ۔ آ ھمے لوٹ ایت کہ ما بلوچ ءَ ھلاس بہ کن ایں۔
آیاں گوشتگ کہ چہ مئے چکچینی ءَ مئے گھگیری گیشتر ترند بیت، آ ھمے سرپد بیت مئے توکل ءَ ھلاس بہ بنت بلے اے آئی بستار نہ اِنت کہ مارا نزور بہ کنت۔ مئے مات ءُ گھارانی ھمت ءَ پچار تو ایشانی توکل ءَ ھلاس کرت کن ئے۔چہ زوراکی کنگ ءَ مئے تہ ءَ گیشتر ھمت ءُ توکل ودی بیت۔
