شال: بیگواھیں بلوچانی توار (وی بی ایم پی ) ءِ سرکماش نسر اللہ ءَ وتی شنگ کرتگیں درشانے ءَ گوشتگ کہ پاروک سکی ءِ زوریں بیگواھی ءِ کیس آئی کھول ءَ گل ءِ کر ءَ یاداشت کرتگ ءُ گوشتگ کہ پاروک سکی ء سکی داد کرکی تربت، کیچ ءِ جاہ منند اِنت پاکستانی لشکر ءَ ھمے سال ءِ 28 مئی ءَ گوں آدگہ پنچ ھمبلانی ھواری ءَ آرپ پلازہ بروری دگ شال ءَ درکاونودی آوار جنگ ءَ پد بیگواہ کرتگ اَنت۔ رند ءَ آدگہ پنچیں آجو بوتگ اَنت پاروک سکی انگت بیگواہ اِنت آئی باروا کھول ءَ ھچ سرپدی دیگ ءَ نہ اَنت ھمے سوب ءَ کھول رنجانی دیمپان اَنت۔
آئی ءَ گوشتگ کہ گل ءَ پاروک سکی ءِ کھول دلجمی داتگ کہ پاروک سکی ءِ کیس ءَ کمیشن ءُسرکار ءَ دیگ ءِ ھواری ءَ پہ آئی آجوئی ءَ ھمک جاہ ءَ توار چست کن ایں۔
نسر اللہ ءَ لوٹ کرتگ ءُ گوشتگ کہ پاروک سکی ءِ سر ءَ چونیں بھتامے ھست گڑا دیم ءَ آرگ ءُ آمدگس ءَ پیش کنگ بہ بیت۔ اگاں بے میار اِنت گڑا زوت یل کنگ بہ بیت ءُ آئی کھول چہ اے گرانیں رنج ءَ کشگ بہ بیت۔
