کیچ: زورگریں پاکستانی لشکر ءِ دست ءَ جتائیں وھداں زور بیگواہ کنگ بوتگیں شش مردم آجو بوتگ ءُ وتی گساں سر اَنت۔
اھوالکار ءِ رد ءَ چہ زامران نوانوا ءَ پاکستانی لشکر ءِ دست ءَ زور بیگواہ کنگ بوتگیں داؤد ابدالوھاب دوشی آجو بوتگ۔ گوں آئی ھوار بیگواہ کنگ بوتگیں شھزاد ابید انگت ءَ بیگواہ اِنت۔
یات بہ بہ اِت کہ پہ داؤد ابدالوھاب ءُ ابید شھزاد ءِ آجوئی ءَ کھول داں پنچ روچاں دمگدار ءِ کارگس ءِ دیم ءَ زھرشانی ءَ نشتگ اَنت۔
ھمے وڑ ءَ چہ تربت ءَ آپسر کولواھی ڈن ءِ بازارءَ زور بیگواہ کنگ بوتگیں یکیں کھول ءِ چار ورنا وسیم ھسن، اجاز شیران، سالھ تارک ءُ امتیاز اکبال دوشی آجو بوتگ ءُ وتی گس ءَ سر بوتگ اَنت۔ اے چاریں ورنا 17 مئی 2024 ءَ چہ آوار جنگ ءُ بیگواہ کنگ بوتگ۔
کھول ءَ آیانی آجوئی ءِ گپ راست کرتگ ءُ گوشتگ کہ سالھ تارک ءُ دگہ یک ھمبلے چہ بازیں آزاراں آیانی سسا نزور اَنت۔
یات بہ بہ اِت کہ اے چاریں زور بیگوھیں مردمانی کھول پہ وتی آزیزانی آجوئی ءَ کیچ دمگدار ءِ کارگس ءِ دیم ءَ زھرشانی ءَ نشتگ اَنت۔
ھمے وڑ ءَ 13 جون 2021 ءَ چہ آپسر تربت ءَ زور بیگواہ کنگ بوتگیں ابدالباسد ء ابدالواھد آجو بوتگ ءُ وتی گس ءَ سر اِنت۔ آجوئی ءِ گپ کھول ءَ راست کرتگ۔
