بلوچ راجی زْرمبشت (بی این ایم) ءِ جارکش ءَ وتی یک درشانے ءَ گْوشتگ کہ سید زھور شاہ ھاشمی کتابجاہ، پہ بلوچ راج ءَ یک منگھیں ربیدگ ءُ زانشتی مڈی یے۔ اے کتابجاہ ءَ نہ تیوک ءَ ھزاراں کتاب، نبشتانک ءُ گْوستانکی چید پھریز اَنت بلکیں اے بلوچ ربیدگ، زبان ءُ گْوستانک ءِ پھریزگ ءُ دیمروئی دیگ ءَ یک ٹوھیں بُنجاھے۔ سند سرکار ءِ اے کتابجاہ ءِ بلڈوزر کنگ ءِ شور بلوچ راجی مڈّیانی سر ءَ تچکی ءَ اُرش کنگ اِنت ءُ دُرسیں بھرگاں بندوکیں مردماں اے سوڑگ گوں تُرندیں دانکاں ایرجنگی اِنت۔
آئی ءَ گْوشتگ کہ اے کتابجاہ ءِ تباھی ءَ نہ تیوک ءَ بلوچ راج ءَ زانشتی ءُ ربیدگی تاوان بیت بلکیں اے ھمے راج ءِ گْوستانک، دودمان ءُ زبان ءِ بگیری ءَ یک ٹوھیں گامگیجے۔سید زھور شاہ ھاشمی ءِ وڑیں شھزانت ءُ زانوگر ءِ جپاکشی ءُ جُھد ھمے کتابجاہ ءِ دْروشُم ءَ پھریز اَنت۔اے کتابجاہ ءِ ھستی پہ بلوچ راج ءَ یک پھرے ءُ ایشی ءِ پھریزگ پہ ما دُرساں ھژدری اِنت۔
جارکش ءَ گْوشتگ کہ ما سند سرکار ءَ کڈن کن ایں کہ آ اے کتابجاہ ءِ بلڈوزر کنگ ءِ وتی شور ءَ واتر بہ زور ایت ءُ پہ ایشی ءِ پھریزگ ءَ ھژدری گامگیج بہ زور ایت۔اے کتابجاہ نہ تیوک ءَ بلوچ راج ءِ مَڈّی اِنت بلکیں پہ براس ئیں راج سندی ءَ یک زانشتی ءُ ربیدگی مڈّی یے ءِ درجہ ءَ اِنت۔
جارکش ءَ گْوشتگ کہ اے کتابجاہ نہ تیوک ءَ سید زھور شاہ ھاشمی ءِ نام ءَ بندوکیں یک ٹوھیں زانشتی مڈّی یے ءُ ایشی ءِ بنپد ءَ شھید سبا دشتیاری ءِ ھون ھوار اَنت،ما چہ بلوچ راج ءَ لوٹ کن ایں کہ ایشی ءِ بگیری ءَ توار چست بہ کن اَنت ءُ اے مڈّی ءِ پھریزگ ءَ ھم پَت بہ بنت۔اے کتابجاہ ءِ پھریزگ مئے راج ءِ گْوستانک ءُ باندات ءِ پھریزگ اِنت، ما ایشی ءَ ھچ پیم ءَ تاوان دیگ ءَ نیل ایں۔ وھد ھمیش اِنت کہ ما دُرس ھواری ءَ اے ٹوھیں مڈّی ءِ رَکینگ ءَ وتی جُھد ءَ تیز بہ کن ایں ءُ سرکار ءَ اے سوڑگ ءِ واتر زورگ ءَ لاچار بہ کن ایں۔
