تربت: دمگدار ءِ کارگس ءِ دیم ءَ برجاھیں زھرشانی نندانک ءَ زور بیگواھیں مردمانی کھول ءُ واکدار ءِ میان ءَ گپ ءُ تران بے سوب بوتگ۔سے شمبے ءِ بیگاہ ءَ کھولانی نیمگ ءَ زھرشانی روانکے کشگ بوتگ۔ زھرشانی روانک ءَ بلوچ یکجھتی کمیٹی ءِ سروک سبگت اللہ شاہ جی، آدگہ سیاسی ءُ چاگردی گلانی سروکءُ باسک، جنین ءُ زھگاں بازیں کچے ءَ بھر زرتگ۔
روانک چہ شھید پدا اھمدچاراہ ءَ درکپتگ ءُ دمگدار ءِ کارگس ءِ دیم ءَ آسر بوتگ۔ زھرشانی ءَ ھواریں مردماں زور بیگواھیں مردمانی اکس، بینرءُ پلے کارڈ دستاں بوتگ اَنت۔آیاں زوریں بیگواھیانی بگیری ءَ اوگام جتگ ءُ بیگواھیں مردمانی آجوئی ءِ لوٹ کرتگ۔
زھرشانی نندانک ءَ پہ گپ ءُ تران ءَ آتکگیں مردماں گوشتگ کہ شما وتی زھرشانی ءَ ھلاس بہ کن اِت ءُ مارا وھد بہ دے اِت ما شمئے زھگاں آجو کناھین ایں، اے درگت ءَ زور بیگواھیں مردمانی کھولانی گوشگ اِنت دانکہ مئے مردم یل کنگ نہ بوتگ اَنت ما وتی زھرشانی ءَ ھلاس نہ کن ایں۔
کھولانی گوشگ اِنت کہ چہ ایشی پیش ھم ما پہ دروگیں دلبڈیاں رد کپتگ ایں ءُ وتی زھرشانی ھلاس کرتگ اَنت، اے رندی دانکہ مئے زھگ آجو کنگ نہ بوتگ اَنت ما ھمے جاہ ءَ وتی زھرشانی نندانک ءَ برجاہ دار ایں۔
زور بیگواھیں مردمانی کھول ءُواکدار ءِ میان ءَ گپ ءُ تران بے سوب بوتگ ءُ زھرشانی نندانک برجاہ اِنت۔
