شال: گوستگیں روچ ءَ چہ اے ون سٹی ءَ سی ٹی ڈی ءِ دست ءَ زور بیگواہ کنگ بوتگیں پاروک ءِ کھول ءِ نیمگ ءَ دمگدار ءِ کارگس ءِ دیم ءَ زھرشانی نندانک برجاہ اِنت۔ زھرشانی نندانک ءَ زور بیگواھیں مردمانی کھول، بلوچ یکجھتی کمیٹی ءِ سروک، نودربر، سیاسی ءُ چاگردی کارکناں ھوار جتائیں بھرگاں سیادی داروکیں بازیں کچے ءَ بھر زرتگ۔
شال دمگدار ءِ کارگس ءِ دیم ءَ پاروک ءِ کھول ءِ ھواری ءَ زور بیگواھیں شیھک ءِ کھول ھم زھرشانی ءَ نشتگ، مرچی شیھک یل کنگ بوتگ ۔ شال پولیس زور بیگواھیں پاروک ءِ کیس ءِ ایپ آئی آر ءَ نبیسگ ءَ نہ اِنت۔
اے باروا زور بیگواھیں پاروک ءِ کھولءِ گوشگ اِنت کہ ما چہ سھب ءَدمگدار ءِ کارگس ءِ دیم ءَ زھرشانی ءَ نشتگ ایں بلے چہ واکدارانی نیمگ ءَ انگت ءَ پہ مئے جیڑہ ءِ باروا انگت ءَگامگیج زورگ نہ بوتگ۔ چہ آیانی گامگیج زورگ ءُ جیڑہ ءِ گیش ءُ گیوار کنگ ءَ اَبید مئے سر ءَ پہ بیڑ برگ ءَ چن ءُ لانچ ءَ کنگ ءَ اِنت۔
آئی ءَ زھرشانی ءَ بھر زورگ ءِ لوٹ کرتگ ءُ گوشتگ کہ ما گوں درسیں مردمانی ھواری ءَ شال ءِ شرپمندیں مردمانی گون ءَ لوٹ کن ایں کہ آ بیا اَنت ءُ مئے زھرشانی ءَ بھر بزور اَنت۔
