تربت: چہ بلیدہ زامران ءَ زور بیگواھیں مردمانی کھولاں مرچی دو روچ اِنت کہ دمگدار ءِ کارگس ءِ دیم ءَ زھرشانی ءَ نشتگ اَنت۔ چہ کیچ واکدار ءِ نیمگ ءَ پہ گپ ءُ تران ءَ انگت ءَ ھچ وڑیں دلجمیں گامگیج زورگ نہ بوتگ۔
چہ بلیدہ ءَ ابید کیچ ءِ جتائیں جاھانی زور بیگوھیں مردمانی کھولاں پہ وتی آزیزانی آجوئی ءَ زھرشانی نندانک ءَ بھر زرتگ ءُ نشتگ اَنت۔ اے وھد ءَ یازدہ زور بیگواھیں مردمانی کھول زھرشانی نندانک ءَ ساڑی اِنت۔ آیانی تہ ءَ مسلم آرپ، نسرم ء پیر بکش، پزیر ء ابدالگنی، جان مھمد ء اللہ داد، داؤد ء ابدوھاب، شھزاد ابید، ھاسل ء پکیر داد، جھانزیب ء پزل کریم، پاروک ء سکی داد ءُ شیھک ء کھور ءِ کھول ساڑی اَنت۔
چہ زور بیگواھیں مردمانی کھولاں ابید بلوچ یکجھتی کمیٹی ءِ سروک کامریڈ وسیم سپر ءُ آدگہ سیاسی ءُ چاگردی کارکناں بازیں کچے ءَ بھر زرتگ۔
چہ زھرشانی نندانک ءَ بی وائی سی ءِ سروک کامریڈ وسیم ءَ تران کرتگ ءُ گوشتگ کہ اےمردم بیگواہ اَنت کسءَ توپک بڈا نہ کرتگ ءُ بمب نہ تراکینتگ اے بلوچ بوگ ءِ میار ءَ زور بیگواہ کنگ بوتگ اَنت۔ اگاں کسے بلوچ اِنت گڑا آ ریاست ءِ میار بار اِنت۔
آئی ءَ گوشتگ کہ بلوچ ءِ میار بلوچ سرڈگار اِنت، بلوچ ءِ پہ پدرچ ءَ جھد اِنت۔ آئی پہ مئے بلوچ پدریچ ءِ ھلاس کنگ ءَ جھد کنگ ءَ اِنت،گڑا مارا اے جاورانی تب سرپد بوگی اِنت وتی پدریچ ءُ پجار زندگ دارگی اِنت۔
