آئرلینڈ: بیگواھیں بلوچانی توار ( وی بی ایم ) ءِ کارگشاد ءُ زور بیگواھیں ڈاکٹر دین مھمد ءِ جنک سمی دین ءَ ڈبلن، آئرلینڈ ءِ نیمگ ءَ برجم داشتگیں مراگش ءَ ایشا ءُ کاھل تیابی دمگ ءِ پرنٹ لائن ڈیپنڈر داد 2024 دیگ بیتگ۔سمی دین ءَ اے ایوارڈ بلوچستان ءَ پہ مردمی ھکانی پدجنگ ءَ دیگ بیتگ۔
برجم داشتگیں مراگش ءَ سمی دین ءَ تران کرتگ ءُ گوشتگ کہ منی پِت ڈاکٹر دین مھمد تو ھرکج ءَ ئے من ترا ھمے گوشگ لوٹاں کہ گوستگیں پانزہ سال اِنت کہ من پہ تئی آجوئی ءَ سکا جھد کرتگ، من ھچبر وت ءَ ایمن نہ بیتگاں ءُ تئی ساڑی نہ بیگ ءِ درداں من ءَ گوں درسیں زور بیگواھیں مردمانی کھولاں توار چست کنگ ءَ لاچار کرتگ۔ من اے تھارونکیں شپانی ءُ بے کساسیں جھد ءِ پارست ءَ پہ انساپ ءُ اوست ءَ وتی جھد برجاہ داشتگ۔
آئی ءَ گوشتگ کہ من سدکاں داں ھما وھد ءَ ایمنی ءَ نہ ننداں دانکہ گڈی بیگواھیں مردم یل کنگ نہ بیتگ۔ من اے داد ءَ بلوچستان ءِ ھما نہ ترسیں مردمانی نام ءَ کناں کہ آیاں ھر وڑیں زوراکی ءُ مردمی ھکانی بگیریانی دیم ءَ من ءَ دلبڈی داتگ۔
یات بہ بہ اِت کہ سمی دین گوستگیں پانزہ سال اِنت پہ وتی زور بیگواھیں پت ڈاکٹردین مھمد ءِ آجوئی ءَ جھد کنگ ءَ اِنت۔ ڈاکٹر دین مھمد سال 2009 ءَ پاکستانی لشکر ءُ چیریں ادارھانی کارمنداں آوار جتگ ءُ بیگواہ کرتگ۔ انگت بیگواہ اِنت۔
