بلوچ یکجھتی کمیٹی ( گوادر) ءَ ما ں رسانکدر ءَ وتی شنگ کرتگیں جارے ءَ گوشتگ کہ بلوچستان ءَ گار ءُ بیگواہ کنگ ءِ جیڑہ سکیں مزنیں جیڑھے ریاست ءِ نیمگ ءَ برجاہ اِنت ھمک روچ بلوچستان ءَ ھمک دمگ ،شھر ءُ کوچگاں بلوچ ورنا آوار جنگ بوگ ءَ انت، گوستگیں روچاں مشکے ءَ یک بلوچ جنینے ھم آوار جنگ بوتگ ۔ اے درگت ءَ 2جون ءَ چہ بلیدہ میناز ءَ یک روانکے درکیت دیم پہ مکران ءِ بنجاھی شھر تربت ءَ کیت ءُ نندانک دنت۔
آئی ءَ گوشتگ کہ بلوچ یکجھتی کمیٹی اے روانک ءِ پلہ مرزی ءَ کنت ءُ 31 مئی ءَ پہ بلوچ گار ءُ بیگواھیں بچاں گوادر پریس کلب ءِ دیم ءَ بیگاہ ءِ پنچ ءَ زھرشانی کنت ۔بلوچ یکجھتی کمیٹی گوں بلوچ راج ءَ دزبندی کنت کہ وتی بے تواری ءُ بے برمشی ءَ پروش بہ دنت ءُ پہ وتی گار ءُ بیگواھیں برات ءُ گوھاراں توار چست کن اِت۔
