شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5461 روچ سرجم بوتگ۔سے شمبے ءِ روچ ءَ بی ایس او پجار ءِ سرکماش بوھیر، کارگشاد ابرار برکت، کمک کارگشاد ڈاکٹر تارک ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم ) ءِ کمک سرکماش ماما کدیر گوں مردماں تران کرتگ ءُ گوشتگ کہ زوراکانی زوراکیاں درسیں جاھاں سیمسر گواز کرتگ اَنت، اود ءَ ایردست ءُ نزوریں راجاں گیشتر گھگیری کرتگ ءُ زوراک پروش داتگ اَنت ایمنی آرتگ ءُزوراکانی زوراکی ھلاس کرتگ اَنت۔ گوستانک اے گپ ءِ شاھد اِنت کہ داں سوبمندی ءَ نزوریں راجاں وتی جھد یکشل ءَ برجاہ داشتگ۔ ھمے جھان ءِ تہ ءَ بلوچ ھم یک نزور ءُ ایردستیں راجے۔
ماما کدیر گوشتگ کہ مردمی گوستانک اے گپ ءِ شاھد اِنت کہ دمگ ءِ کجام جاہ ءَ زوراکیانی بگری ءَ چست بوتگیں ھک ءِ توار کشت ءُ کوش ءُ زوراکیاں دارگ نہ بوتگ اَنت ءُ نہ ھلاس کنگ بوتگ اَنت۔ مدام زورگریں زوراکاں ایردستانی بگیری ءَ پہ ایردست کنگ ءَ درسیں زور چکاس اتگ اَنت۔ انوگیں وھد ءَ بلوچ راج ھم ھمے جاورانی دیمپان اِنت۔ بیا اِت گوں ھواری ءَ اے درسیں زمزیلانی پروش دیگ ءَ ایمنیں جھد ءِ کاروان ءَ بھر بزور اِت۔
آئی ءَ گوشتگ کہ زورگریں پاکستانی دلارانی کمک کنگ ءِ مرادسرڈگارءِ شھیدانی ھونانی گون ءَ ناھکی اِنت ءُ وتی ایردستی ءِ گیشتر مھکم کنگ اِنت۔ انوں بہ جیڑ اِت کہ بلوچ ریاستی آزارانی آماچ اِنت۔ کسے ءِ برات یا سیادے شھید کنگ بوتگ یا ریاست ءِ زوراکیانی دیمپان اِنت۔ ما گوں اکوام متھدہ ءُ میان استمانی مردمی ھکانی گلانی گون ءَ لوٹ کن ایں کہ بلوچستان ءَ پاکستان ریاست ءِ زوراکیانی ءُ مردمی ھکانی لپاشگ ءِ دارگ ءَ گامگیج بزور اَنت ءُ بلوچ چکچینی، شھری آبادیانی سر ءَ بمبگواری، آوارجنی، زوریں بیگواھی ءُ ژانگولیں لاشانی چگل ءِ دیگ ءِ باروا پاکستان ءَ زور بہ دنت۔
