گوٹنگن ، جرمنی – بلوچ راجی زْرمبشت ( بی این ایم ) ءَ بلوچستان ءَ پاکستان ءِ جوھری چکاسانی بگیری ءَ جرمنی ءِ شھر گوٹنگن ءَ زھرشانی کرتگ۔اے روچ ، بلوچستان ءَ سیاھیں روچ ءِ بستار ءَ دارگ بیت ءُ 1998 ءَ بلوچستان ءِ ھند چاگے ءَ کنگ بیتگیں جوھری تْراک یاد کنگ بہ اَنت۔زھرشانی کنوکاں اے تْراکانی دیرمانیں سان سھرا کرتگ اَنت ، کہ ایشانی پد ءَ دمگ ءَ مزنیں کچے ءَ جاندْراھی ءُ اگوازی تک ءَ بیرانی بیتگ۔
’ اے مئے سر ءَ ارش اَت اَنت، شرھسن‘
بی این ایم جرمنی تک ءِ کماش شرھشن ءَ بلوچستان ءِ زورگری ءُ لشکری لگتمالی ءِ سر ءَ دلگوش پرینان ءَ گْوشتگ ، 28 مئی 1998 ءَ پاکستان ءَ بلوچستان ءَ نام گپتیں چکاس کرت اَنت بلے اے مئے بگیری ءَ ارش بیتگ اَنت پرچا کہ پاکستان ءَ 1948 ءَ بلوچستان زور گپتگ۔اے چکاس بلوچستان ءَ مہ بوتین اَنت بلکیں پنجاپ ءَ بوتین اَنت۔بلوچستان ءَ نوک آبادی سرپد بہ اَنت ءُ پاکستان ایشی ءَ پہ سلاھانی چکاسگ ءَ کارمرد کنگ ءَ اِنت، کہ چہ آیاں چین ءِ سلاہ ھم ھوار اَنت۔ما اے زورگر ءُ لگتمالی ءِ بگیری ءَ اوشتاتگ ایں۔ بلوچ راج اے کارروائیاں نہ من ایت ءُ وتی سرڈگار ءِ سر ءَ ھرچ وڑیں زورگری ءُ سرمایہ داری ءِ بگیری ءَ گھگیری کنت۔
’ اے چکاس میان استمانی جوھری مسامانی پدریں بگیری اَت اَنت، سپیہ منزور‘
بی این ایم جرمنی تک ءِ کمک کماش سپیہ منزور ءَ پاکستان ءِ جوھری چکاس ایر جتگ اَنت ءُ میان استمانی مزدانک ، یکجھتی ءِ سر ءَ زور داتگ ءُ گْوشتگ مروچی ما بلوچستان ءَ پاکستان ءِ جوھری چکاسانی ایر جنگ ءَ اد ءَ مچ ایں۔کہ آیاں وتی پشت ءَ جیڑہ ءُ بیرانی اشتگ کہ داں مروچی مئے مردماں سانمند کنگ ءَ اَنت۔اے چکاس میان استمانی جوھری مسامانی پدریں بگیری اَت اَنت، کہ آ ناں ایوک ءَ بلوچستان بلکیں پہ میان استمانی رستگاری ( سلامتی ) ءَ ھم ترس ودی کنگ ءَ اَت اَنت۔
’ پاکستان ءِ 1998 ءِ جوھری چکاسانی بدیں سان اَنت ، چہ ایشی ءَ شیمک ءُ چکانی مرگ ءِ کچ سک گیش بیتگ، ابدل جبار ‘
بی این ایم جرمنی ءِ کارگشاد ابدل جبار ءَ جوھری چکاسانی مردم ءُ اگواز ءِ سر ءَ بدیں سانانی بارہ ءَ الکاپی ءَ گپ جتگ ءُ گْوشتگ، 28 مئی 1998 ءَ پاکستان ءِ جوھری چکاسانی پد ءَ ترندیں رنگے ءَ اگواز لیگار (آلودہ) بیتگ ، تابکاری ءِ پد ءَ شیمک ، چکانی مرگانی تہ ءَ گیشی ءُ مزنیں کچے ءَ اگوازی تاوان بیتگ اَنت۔اے سانانی آزادیں رنگے ءَ پٹ ءُ پول ءَ نہ ھلگ ءَ اَنت۔
آئی ءَ گْوشتگ بلوچستان چہ پاکستانی سرکار ءِ نیمگ ءَ مردمی اگبالانی مزنیں بگیریانی آماچ اِنت ، چہ ایشاں زوربیگواھی، درآمیدگسی کوش ءُ ناپتیں درشانانی ( اختلاف رائے ) گٹگیر کنگ ھوار اَنت۔
’میان استمان پاکستان ءِ جوھری سلاھانی سر ءَ پابندی بہ جنت۔ شلی ‘
بی این ایم جرمنی تک ءِ کمک کارگشاد شلی ءَ گْوشتگ سانمندیں چکاں مزدانک ءُ مدد پکار اِنت۔
آئی ءَ گْوشتگ بلوچستان ءَ 1998 ءِ جوھری چکاسانی پد ءَ جینیاتی نادراھی ءِ آماچ بیتگیں چکاں پہ مزدانک ءُ پراوستیں باندات ءَ زیت کمک پکار اِنت۔
آئی ءَ زور داتگ میان استمان بلوچستان ءَ بیوکیں ٹوھیں جنگی میاراں بہ من ایت ءُ پاکستان ءِ جوھری سلاھانی سر ءَ پابندی جنگ ءِ لوٹ ءِ پد ءَ گامگیج بہ زیر ایت۔
1998 ءَ پاکستان ءَ چاگے ءَ جوھری چکاس کرت،آ اود ءِ نندوک ابید سھی کنگ ءَ گساں در کنگ بوت اَنت، ازگر ‘
بی این ایم جرمنی تک ءِ پیسرگیں کماش ازگر ءَ گْوشتگ میان استمانی تک ءَ بلوچستان ءِ جیڑہ منگ لوٹ اَنت۔ 1998 ءَ پاکستان ءَ چاگے ءَ جوھری چکاس کرت ، آ اود ءِ نندوکیں مردم اش سھی نہ کرت اَنت ءُ چہ گساں در کرت اَنت۔ اے زوریں بے گسی ءَ سدانی کچ ءَ مردم چہ لوگ ءُ دواراں زبھر بوت۔میان استمان اے نامزدانکی ءَ بہ من ایت ءُ ایشی ءَ پر بہ کنت۔
’پاکستان ءِ جوھری چکاسانی روچ بلوچستان ءِ گْوستانک ءَ پرس ءِ روچے۔ آسپ‘
بی این ایم ءِ باسک آسپ ءَ اے چکاس ایر جتگ اَنت ءُ میان استمانی تک ءَ کارروائی ءِ لوٹ کرتگ۔
آئی ءَ گْوشتگ 28 مئی 1998 ءَ چاگے ، بلوچستان ءَ پاکستان ءِ جوھری چکاسانی روچ بلوچستان ءِ گْوستانک ءَ پرس ءِ روچ اِنت۔اے چکاس ، کہ ’ اسلای بم‘ گْوشگ بیت ، ایشی ءِ تباہ کنیں آسر در کپت اَنت، چوش کہ تابکاری ءِ سان ءُ کشندھیں نادْراھی۔
آئی ءَ زور داتگ ءُ گْوشتگ میان استمان پہ پاکستان ءِ جوھری سلاھانی کمی ءَ مالی کمک ءِ ڈک ءَ بہ جنت۔
’سرکار ءُ مزنیں گلانی پہ تاوان ءِ پر کنگ ءَ دلگوش دیگ المی اِنت، سموداد‘
سمو داد ءَ گْوشتگ بلوچستان ءِ جاورانی گھتر کنگ ءَ گر ءُ دار ءُ کارورائی لوٹ ایت۔
آئی ءَ گْوشتگ مارا گپ جنگی اِنت۔ ما اے گپ ءَ الم بہ کن ایں کہ ھرچی بیتگ کسے ایشی ءِ زمہ واری ءَ بہ زیر ایت۔پہ سرکار ءُ مزنیں گلاں اے المی اِنت کہ آ تاوان ءِ پر کنگ ، اگواز ءِ سرسبزی ءُ سانمند بیتگیں مردمانی کمک ءِ سر ءَ دلگوش بہ کن اَنت۔
شاری ءَ گپ جنان ءَ چہ جوھری چکاساں ودی بیوکیں جیڑہ ءُ دمگ ءِ گھبود ءِ ڈالچار کنگ ءِ نیمگ ءَ دلگوش پرینتگ ، آئی ءَ گْوشتگ بلوچستان ءَ مئے مردمانی درد چد ءُ گیشتر ڈالچار بیت نہ کن اَنت۔
بلوچ راجی زْرمبشت ( بی این ایم ) ءِ باسک ایمان ءُ بالاچ ءَ بلوچستان ءَ جوھری چکاس ءُزوراکی ءِ آسر کنگ ءِ لوٹ کنان ءَ گْوشتگ چہ 28 مئی 1998 ءَ مئے مردم نادْراھی ءُ اگوازی تاوانانی آماچ اَنت۔ ما اے چکاسانی آسر کنگ ءِ لوٹ ءَ کن ایں۔مئے سرکار ءَ اے ترسناکیں چکاس دارگ لوٹ اَنت۔مئے مردم ابید چہ جوھری سلاھاں پر ایمن ءُ پھاز اتگیں بانداتے کرز اَنت۔
اے زھرشانی ءَ ماں گانسیلیسل ءَ جوھری بم ءِ بگیری ءَ کسمانکے ھم پیش کنگ بیتگ، آئی ءِ تہ ءَ انچیں جھانے ءِ ندارگ پیش دارگ بیتگ کہ مردم گین پر کرت نہ کن اَنت۔اے کسمانک ءَ جوھری شوربندیاں ھواریں سرکاری کارمندانی سروگان ءُ لشکری سروگانانی بدیں کردار ءِ سر ءَ ایراد گرگ بیتگ۔
بلوچ راجی زْرمبشت ( بی این ایم ) جوھری تابکاری ءِ سانانی سر ءَ پٹ ءُ پول ءَ آزادیں میان استمانی پٹ ءُ پولی کاربولک ( ٹیم ) ءِ لوٹ ءَ کنت۔ پاکستان ماں بلوچستان ءَ آئی ءِ بے پرواھیں چکاسنی سر ءَ جست کنگ ءُ ڈنڈ دیگ بہ بیت، کہ آئی ءَ چاگی ءِ نندوکیں مردم یکشل ءَ تاوان داتگ اَنت۔ اے چکاسانی تباہ کنیں سان ءِ بارہ مردم سھی کنگ بہ بہ اَنت ءُ پاکستان ءِ چہ جوھری سلاھاں پاک کنگ ءَ ترندیں گامگیج زیرگ بہ بیت۔
بالاچ ءَ بلوچستان ءِ شانداریں دود ءِ ستا شانی ءَ زھرشانی ءِ بندات گوں بینجو ءَ چہ راجی سوت کرت۔
