بلوچ راجی زرمبشت ( بی این ایم ) ءِ بنجاھی جارکش ءَ برمش روچ ءِ درگت ءَ وتی شنگ کرتگیں درشانءَ گوشتگ کہ برمش روچ بلوچ گھگیری ءِ انوگیں گوستانک ءِ نوکیں کارستے۔ برمش روچ گوں آئی نہ ترسیں مات بی بی ملک ناز ءَ ھمگرنچ اِنت کہ آئی ریاستی رسترانی دیم ءَ گھگیری ءَ وتی ھون ریتکگ اَنت بلوچ چاگرد ءَ پاکستان ریاست ءِ چہ زوراکی ءُ رستری ءَ برجاھیں ترس گوں گھگیری، ھمت ءُ نہ منگ ءَ آشوبے آورتگ۔
جارکش ءَ گوشتگ کہ برمش روچ ءِ دارگ ءِ مول ھمے گونڈلیں زھگ، شیرزالیں مات ءُ گھگیری کنوکیں بلوچ زھگاں ستک شانی ندر کنگ اِنت آیاں بلوچ پدریچ، بلوچی گیرتءُ پہ راجی آجوئی ءَ سر ندر کرتگ اَنت، دیم پہ دیمی کنگ ءَ نمیران بوتگ اَنت۔ اے روچ مارا ھمے ترانگ ءَ گیج ایت کہ پاکستان ءِ زوراکیانی دیم پہ دیمی ءَ نہ تیوک ءَ کسان امریں مردم کنگ ءَ اَنت بلکیں کودکیں زھگ، جنین ءُ بے میاریں مردم آماچ بوگ ءَ اَنت۔ بلوچ گوستانک مدام ملک ناز ودی کنت ءُ دیم ءَ ھم بلوچ انچیں نہ ترس ودی کناں کنت پمیشکا کہ بلوچ چاگرد سنٹ نہ اِنت۔ سنٹ ھما چاگرد اَنت کہ دیم پہ دیمی نہ کن اَنت، گھگیری نہ کن اَنت، آیانی تہ ءَ آجوئی ءِ لوٹ ءُ جوزگ نہ بیت، بلے بلوچ چاگرد چہ گھگیری، دیم پہ دیمی ءُ شھزانتی ءِ جوزگ ءَ پھرمند اِنت۔
جارکش ءَ دیمتر ءَ گوشتگ کہ برمش روچ ءِ دارگءِ مول ملک ناز ءِ ستک شانی ندر کنگ ءَ ابید پاکستان ءِ بدیں دروشم ءِ جھان ءِ دیم ءَ پیش دارگ اِنت، پاکستان ءَ کجام وڑ ءَ بلوچ چاگرد ءِ تہ ءَ ترس ءِ برجاہ دارگ ءُ ورنایانی بے سمائی ءُ وتسری ءِ آماچ کنگ ءَ دزی، لٹ ءُ پلانی ءُ مذھبی ناشرکارانی مھکم کنگ ءُ کشندہ ٹولی ءِ دروشم دیگءُ مرچی بلوچستان ءَ پاکستانی لشکری ادارھانی سروکی ءَ مرگ ءِ باپاری برجاہ اِنت۔بلے ھمے چہ ملک ناز جست بوتگءُ گھگیر کنت گڑا بلوچ چاگرد ءَ نوکیں زورے ودی کنت۔
جارکش ءَ گڈی ءَ گوشتگ کہ ملک ناز ءِ گھگیری بلوچ راجی گوستانک ءِ یک نوکیں کارستے۔ اے روچ مارا منزل ءِ یات ءَ گیج ایت کہ گھگیری پدریچ ءُ گھگیری ھم بلوچ ءَ یک وشیں بانداتے دنت ءُ راجانی لڑا برابری ءِ بستا رءَ دنت۔
