بلوچ آجوئی لشکر ( بی ایل اے ) ءِ جارکش جیھند ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں کیچ ءِ ھند تجابان ءَ دوشی زورگریں پاکستانی لشکر ءِ بنجل ارش ءَ نشانگ کرتگ، ارش ءِ آسر ءَ چار دژمنیں کارمند مرتگ ءُ پنچ ٹپی بوتگ۔
آئی ءَ گوشتگ کہ سرمچاراں دژمنیں لشکر ءِ بنجل ءِ سر ءَ یکیں وھد ءَ دو نیمگاں گوں راکٹ، گرنیڈ لانچر ءُ آدگہ مزنیں سلاھاں ارش کرتگ۔ بیست منٹ ءِ برجاھیں اے ارش ءَ دژمن ءِ سے پانگس تباہ بوتگ، آیانی تہ ءَ ساڑی ئیں دو کارمند جاھی مرتگ ءُ پنچ ٹپی بوتگ، دگہ دو کارمند سرمچاراں گوں دور جنوکیں سلاھاں نشانگ کرتگ ءُ کشتگ اَنت۔
جارکش ءَ گوشتگ کہ ارش ءِ آسر ءَ دژمنیں لشکر ءِاوشتاتگیں دو گاڑی تباہ بوتگ، اے میان ءَ دژمنیں لشکر ءَ سرویلینس کیمرہ کارمرز کنگ ءِ جھد کرتگ آ سرمچاراں جتگ ءُ دور داتگ اَنت۔
بی ایل اے ءِ جارکش جیھند ءَ ارش ءِ زمہ واری من اتگ ءُ گوشتگ کہ چہ بلوچ سرڈگار ءَ زورگریں پاکستانی لشکر ءِ سرجم ءَ در آھگ ءَ مئے ارش برجاہ بنت۔
