بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں مستونگ ءَ کڈکوچگ ءَ مادن بروکیں ٹرک نشانگ کُرتگ اَنت۔
آئی ءَ گوشتگ کہ مرچی 24 مئی ءِ روچ ءِ چار ءَ سرمچاراں کڈکوچگ ءِ میانجی ءَ ژلی ءَ مادن بروکیں شش ٹرکانی سر ءَ تیرگْواری کُرتگ ءُ ٹائر تراکینتگ اَنت۔ گاڑیانی ڈرائیور ءُ کلینر کڈن کُرتگ ءُ یل داتگ اَنت۔
جارکش ءَ گوشتگ کہ ما تچکی ءَ گْوش ایں کہ کَس ءَ ما بلوچستان ءِ مادنانی برگ ءِ موکلءَ نہ دئیں۔زورگریں پاکستانی لشکر ءُ سرکاری شرکتانی ھمراھی ءَ لُٹ ءُ پُلی شوربندیانی شریداریں شرکت چہ بلوچ راجی مڈیانی لُٹ ءُ پُل ءَ دزکش بہ بنت اگاں نہ تُرندیں اُرشانی دیمپان بنت۔
آئی ءَ گوشتگ کہ ما مادن بروکیں گاڑی ڈرائیور ءُ واھنداں تچکی ءَ گْوشگ لوٹ ایں کہ چہ اے کار ءَ گستا بہ بنت اگاں نہ گڑا وتی جانی ءُ مالی تاوان ءِ زمہ وار وت اَنت۔
میجر گھرام ءَارش ءِ زمہ واری من اتگ ءُ گوشتگ کہ داں سرجمیں سرڈگار ءِ آجوئی ءَ زورگریں لشکر ءُ ریاست ءِ دُرسیں سیت مئے نشانگ ءَ اَنت۔
