شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5456 روچ سرجم بوتگ۔ پنچ شمبے ءِ روچ ءَ وکیل، سول سوسائٹی ءِباسکاں ھوار جتائیں بھرگاں سیادی داروکیں مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ پاکستانی چیریں ادارھانی ناشریں زوراکی برجاہ اَنت۔ اے درسیں زوراکیانی مول بلوچ ءِ ایمنیں جھد ءِ دارگ ءِ بے سوبین جھد اِنت۔ چہ ایشی ابید پاکستانی لشکر ءُ چیریں ادارہ کودکیں بلوچ پسگاں زور بیگواہ کنگ ءَ اَنتءُ آیانی ژانگولیں لاش کلات، منگوچر، مستونگءُ بولان ءَ ابید بلوچستان ءِ جتائیں ھند ءُ دمگاں دست کپتگ اَنت۔
ماما کدیر گوشتگ کہ ورنایانی زور بیگواہ ءُ شھید کنوکیں مردم ھما ناشرکار اَنت کہ گوں کشندہ ٹولی ءَ ھمراہ اَنت۔ آ پہ مردمانی رد دیگ ءَ روتاکاں درشان شنگ کنگ ءُ ژانگولیں لاشانی چگل دیگ ءُ زوریں بیگواھیاں ایر جنگ ءَ اَنت، بلے چیر اندری ءَ درسیں کاروائیاں پاکستان ریاست ءِ گون ءَ ھوار اَنت۔
ماما کدیر گوشتگ کہ پاکستانی لشکر ءَ وتی تر ءُ گرد تیز کرتگ اَنت ءُ بازی کچے ءَ جتا جتائیں ھنداں آتکگ ءُ سر بوتگ آ پہ کشت ءُ کوش ءُ ھونریچی ءَ چن ءُ لانچ ءَ کنگ ءَ اِنت۔
