![](https://zrumbesh.com/wp-content/uploads/2024/05/WhatsApp-Image-2024-05-20-at-09.46.45_8a6e77cd.jpg)
تربت: دو روچ پیش چہ آپسر ءَ پاکستانی لشکر ءِ دست ءَ زور بیگواہ کنگ بوتگیں ورنا سالھ ء ِ پت تارک ءَ وتی شنگ کرتگیں تامربندے ءَ گوشتگ کہ 17 مئی ءَ لشکر ءَمنی گس ءَ بیڑ برتگ ءُ منی بچ سالھ، منی گھارزتک اجاز، وسیم ء ھاجی ھسن ءُ امتیاز چار زھگ آوار جتگ کہ یکیں کھول ءِ مردم اَنت۔ من پہ آیانی بیگواھی ءَ پریس کانپریس کرتگ۔ پریس کانپریس ءَ من آیان ءَ دو روچ ءِ وھد داتگ دو روچ مرچی سرجم بوتگ۔
آئی گوشگ اِنت من دمگدار ءِ کر ءَ شتگ آں گڑا آئی پد ءَ من ءَ دگہ دو روچ ءِ وھد داتگ، من گوشتگ کہ ایپ آئی آربہ نبیس آئی ءَ ایپ آئی آر نہ کرتگ۔ من ھمے گوشتگ کہ اگاں باند ءَ منی زھگ ءِ سر ءَ بھتامے بہ جن اَنت ایشی ءَ دگہ چیزے گوں بوتگ پد ءَ منی گونڈو ءِ سر ءَ ایپ آئی آر کنگ بیت ءُ آیانی سر ءَ ایپ آئی آر نہ بیت، چوش مہ بیت کہ باندا منی زھگ ءِ سرءَ ایپ آئی آر بہ کن اَنت ءُ دروگیں کیسے جنگ بہ بیت۔
تارک گوشتگ کہ منی زھگ بے میار اِنت آ یک زمبادے ءِ ڈرائیور اِنت، گوں آئی ءَ بیگواہ بوتگیں چاریں ڈرائیور اَنت۔ آ مردم کہ جنگ کن اَنت گڑا گس ءَ نہ وپس اَنت۔ اے مردم چہ مئے گس ءَ آوار جنگ بوتگ اَنت من ھمے لوٹ ءَ کن آں کہ مئے زھگاں آجو بہ کن اِت۔
آئی ءَ گوشتگ کہ اگاں یک ءُ دو روچ ءَ مئے زھگ آجو نہ بوت اَنت گڑا من دمگدار ءِ کارگس ءِ دیم ءَ زھرشانی ءَ ننداں یا دگ ءَ بند کن ایں۔ من یک روچے ھرتال ءِ جار ءَ جن آں چہ ایشی ءَ پد زھرشانی کن ایں۔