شال : پہ زور بیگواھیں مردمانی پدجنگ ءَ شدکشیں زھرشانی گدان ءَ 5452 روچ سرجم بوتگ۔ دوشمبے ءِ روچ ءَ بی وائی سی ( کراچی ) ءِ سروک ابدالوھاب، وتن پارٹی ءِ ھیدر رئیسانی، بی ایس او شال ھنکین ءِ سروک کبیر ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ زورگرگوں وتی چکچینی کاروائیاں بلوچ راجی ایمنیں جھد ءَ داشت نہ کنت۔ وی بی ایم ءِگوستانک ءِ تہ ءَ دراجکشیں جھد ءِ ھک ءُ پہ آزیزانی آجوئی ءُ زوراکیانی بگیری ءَ جھد یک منانکے جوڑ بوتگ۔ اے دراجکشیں جھد ءَ بلوچ راج ءِ سر ءَ بیوکیں پاکستان ءِ زوراکی ءُ بلوچ پسگانی زوریں بیگواھی ءُ شھیدیانی ھال جھان ءِ کنڈ کنڈ ءَ سر بوتگ۔
آئی ءَ گوشتگ کہ مرد، جنین، زھگ ءُ کماشانی ارادہ ءُ دراجکشیں جھد ءَ ابید جھان ءِ میارباریں بے تواری برجاہ اِنت۔ پاکستان ءِ زورگپتیں ادارہ گوں وتی پندل ساز ءُ دلاراں ایمنیں جھد ءَ پروش دیگ لوٹگ ءَ اَنت، بلے درسیں ھیلیھاں ابید آیاں جھد داشت نہ کرتگ۔
ماما کدیر گوشتگ کہ پاکستانی لشکر پہ بلوچانی زوریں بیگواھی ءُ شھید کنگ ءِ درچ ءِ برجاہ دارگ ءُ بلوچ چکچینی ءِ تیز کنگ ءَ نوکیں زور چکاسگ ءَ اِنت۔مکران ءَ ھوار جتائیں ھند ءُ دمگاں لشکرکشی تیز کرتگ اَنت۔ اکوام متھدہ ءَ ھوار جھان ءِ بے تواری ءِ سوب ءَ پاکستان وتی زوراکیاں تیز کنگ ءَ اِنت، ایشی سان سرجمیں دمگ ءِ سر ءَ کپتگ اَنت۔
