تربت: آپسر ڈن سر ءِ جاہ منند تارک داؤد جنینانی ھمراھی ءَ شمبے ءِ بیگاہ ءَ تربت پریس کلب ءَ پریس کانپریس کرتگ ءُ گوشتگ کہ سی ٹی ڈی ءُ آدگہ ادارھاں مئے گساں دوشی یک ءِ نزیک ءَ چار ورنا آوار جتگ ءُ بیگواہ کرتگ زوت آجو کنگ بہ بنت، اگاں داں دو روچءَ یل کنگ نہ بوتگ اَنت گڑا ما ڈی بلوچ ءُ ھوشاپ ءَ سی پیک دگ ءَ بند کن ایں۔
آئی ءَ گوشتگ کہ ھمے چاریں ورنا بیگواہ اَنت آ سیمسر ءَ گاڑیانی ڈرائیور ءِ ھساب ءَ مزدوری کنگ ءَ بوتگ اَنت، ما آیانی زوریں بیگواھی ءَ سی ٹی ڈی ءِ بگیری ءَ ایپ آئی آر نبشتہ کرتگ۔ ما ترسگ ءَ ایں کہ سی ٹی ڈی آیانی سر ءَ دروگیں کیس جنت ءُ دروگیں میڑے ءَ مہ جنت چی ءَ کہ چہ ایشی پیش سی ٹی ڈی ءَ دھانی کچ ءَ مردم دروگیں میڑاں کشتگ اَنت۔
آئی ءَ گوشتگ کہ زوربیگواھیں مردمانی تہ ءَ سالھ تارک، وسیم ھسن، امتیاز اکبال ءُ اجاز شیران ھوار اَنت۔ درس یکیں وھد ءَ شپ ءِ یک ءَ چہ گساں وپتگیں واب ءَ آوار جنگ ءُ بیگواہ کنگ بوتگ اَنت۔
آئی ءَ گوشتگ کہ اگاں دو روچانی تہ ءَ چاریں ورنا یل کنگ ءُ مارا سرکنگ نہ بوت اَنت یا آمیدگس ءَ پیش کنگ نہ بوت اَنت گڑا ما لاچاریں کہ سی پیک دگ ءَ زھرشانی بہ کن ایں ءُ تربت کراچی ءُ تربت شال دگ ءَ بند بہ کن ایں ، ایشی زمہ واری سی ٹی ڈی ءُ واکدار ءِ سر ءَ بیت۔
پریس کانپریس ءَ زور بیگواھیں سالھ تارک ءِ گھار ءَ گوشتگ کہ منی برات سالھ زامباد گاڑی ءِ ڈرائیورے اگاں آئی سر ءَ چونیں بھتامے ھست گڑا آمیدگس ءَ پیش کنگ ءُ آئی میارباری گوشگ بہ بیت۔
زوربیگواھیں وسیم ءِ گھار ءَ گوشتگ کہ شپ ءَ یک ءُ نیم ءِ نزیک ءَ چہ مئے گس ءَوسیم آوار جنگ بوتگ ما گس ءِ درسیں مردم شاھد ایں۔ مارا ترس اِنت کہ سی ٹی ڈی آیاں دروگیں میڑاں کش ایت ءُ دروگیں نیمون کنت انچوش بالاچ مولا بکش ءُ آدگہ بیگواھیں مردمانی گون ءَ بوتگ۔
آیاں گوں وتگڑیں سرکار ءَ لوٹ کرتگ کہ چاریں مردمانی زوت یل کناھینگ ءَ مئے کمک ءَ بہ کنت۔
