بلوچ راجی راھشون ءُ بلوچستان آجوئی سنگر (بی ایل ایپ) ءِ سرکماش ڈاکٹر اللہ نزر ءَ ماں رسانکدر ءَ وتی شنگ کُرتگیں درشانے ءَ گْوشتگ کہ بلوچ راج چہ وتی ھمساھگیں ڈیھاں ایران، اوگانستان، ھندوستان ءُ چہ روکپتی دُرسیں ڈیھاں دزبندی کنت کہ آ مئے وتواجھی جُھد ءَ گوں ما ھمکوپگ بہ بنت۔ ما چہ یورپی یونین، امریکا، اکوام متھدہ ءُ مردمی اگبالانی گلاں ھوار چہ میان استمان ءَ ھم لوٹ کن ایں کہ آ پاکستانی ریاست ءِ نیمگ ءَ بلوچ راج ءِ بگیری ءَ برجاھیں مردمی اگبالانی بگیریاں بہ منّ ایت۔
بلوچ راھشون ءَ گْوشتگ کہ آیاں بلوچ جُھد ءِ پلہ مرزی ءَ دیم ءَ آھگی اِنت کہ بلوچ ءَ چہ ھزاراں سالاں وتی یک جتائیں دودمان ءُ گْوستانکی پجارے برجاہ داشتگ۔ گوں ارباں مئے دیریگین ءُ شریں سیادی یے ھست۔ پاکستان، 1947 ءَ جوڑ کنگ بیتگیں ریاستے، بلوچستان ءِ سر ءَ 76 سال اِنت کہ زور گِر اِنت ءُ مئے مردماں زور ءُ زوراکی ءِ نشانگ کنگ ءَ اِنت۔
آئی ءَ زور داتگ سئودی ولی اَھد شھزادگ مھمد بن سلمان ءُ مزن ھور ءِ سرکماش اِزت ماب مھمد بن زید النھیان ءَ گْوشتگ کہ آ پاکستان ءِ بگیری ءَ بلوچانی جُھد ءَ بہ منّ اَنت چے ءَ کہ بلوچ ءُ اربانی سد سالی گْوستانکی سیادی یے ھست ءُ پاکستان یک نوک ءُ وتگڑیں ڈیھے۔
بلوچ سروک ءَ گْوشتگ کہ ما مشکے، آواران ءُ گوادر ءَ پاکستانی کُشندہ ٹولی ءِ دستاں بےمیاریں بلوچانی کوش ءَ ایرجن ایں۔ اے زوراکی بلوچ آجوئی زْرمبشت ءِ ایراد کنگ ءَ پاکستانی لشکر ءِ رستری تُکشام ءِ دْرچ اِنت، کہ بلوچ جُھد ءَ گوں تیزی ءَ مردمانی پلہ مرزی گون بیگ ءَ اِنت۔
آئی ءَ گْوشتگ کہ بلوچ جُھد پہ یک پدریچ ءُ مزھبے ءِ بگیری ءَ نہ اِنت۔ مئے یک سیکولر زْرمبشت ئِے کہ چہ زوراکیں پاکستانی ریاست ءَ پہ وتی آجوئی ءَ جنگ کنگ ءَ اِنت۔
ڈاکٹر اللہ نزر ءَ زور داتگ ءُ گْوشتگ کہ چین ءَ وتی آجوئی ءِ جنگ وت کُرتگ،آئی ءَ آجوئی ءِ زْرمبشتانی مھکمیں جوزگ زانگ لوٹ اَنت۔ ما گوں آجزی ءَ چہ چین ءَ لوٹ کن ایں کہ آ پہ پاکستان ءَ وتی مالی لشکری کمک ءَ بند بہ کنت، کہ پہ بلوچانی کُشگ ءَ کارمرد بنت۔
بلوچ راھشون ءَ گْوشتگ کہ بلوچ راج ایمنی ءُ انساپ ءِ واھگدار اِنت۔ما لوٹ ایں کہ جھان مئے ناگیگییں جاوراں سرپد بہ بیت ءُ مئے آجوئی ءِ پلہ مرزی ءَ بہ کنت۔
