گوادر: بلوچ یکجھتی کمیٹی ءِ نیمگ ءَ گوادر ٹٹ ءِ بگیری ءَ زھرشانی روانکے کشگ بوتگ۔ روانک چہ جاوید کمپلیکس ءَ درکپتگ ءُ داں جیمڑی ءِ شھیدانی چاراہ ءَ شتگ ءُ مچ بوتگ اَنت۔
زھرشانی روانک ءَ بلوچ یکجھتی کمیٹی ءِ سروک سبگت اللہ شاہ جی ءُ کامریڈ وسیم سپر ءَ ھوار آدگہ سیاسی سروک ءُ باسکاں، جنین ءُ زھگاں بازیں کچے ءَ بھر زرتگ۔ زھرشانی کنوکیں مردماں پلے کارڈ دستان بوتگ اَنت کہ آیانی سر ءَ جتائیں اوگام نبشتہ بوتگ۔
آیاں تران کرتگ ءُ گوشتگ کہ اے وڑیں وھداں درسیں سیاسی گلاں یکجاہ بوگ ءُ جھد کنگی اِنت چی ءَ کہ بلوچاں کدی ھم درآمدانی ایردستی نہ من اتگ۔ اے بلوچ ءِ روایت اِنت کہ اگاں بلوچ ءَ جنگ لوٹ ئے گڑا آئی ءَ مھر بدے ءُ وتی برات بہ کن آ پہ تو ساہ ءَ دنت۔
آیاں گوشتگ کہ بلوچ پہ وتی سرڈگار ءُ زر ءِ پھریزگ ءَ وتی گڈی زور ءَ جنت ءُ پہ وتی ساہ ءُ سر ءِ دیمونی دیگ ءَ چک ءُ پد نہ بیت۔ اے گپ ءِ منانک ھمیش اِنت کہ مرچی پہ اے زھرشانی ءَ مئے گھار چہ شال ءُ آدگہ دوریں جاھاں آتکگ اَنت۔ آیاں ھمے پیش داشتگ کہ اے تیوک ءَ گوادر نہ بلوچستان ءِ جیڑہ اِنت۔
آیاں گوشتگ کہ مرچی بلوچ یکجھتی کمیٹی ءِ نیمگءَ اے زھرشانی برجاہ اِنت ما اے گپ ءَ نہ گوش ایں کہ مردم تیوک ءَ پہ بلوچ یکجھتی کمیٹی ءِ توار ءَ یکجاہ بہ بہ اَنت، ماشمارا ھمے گوشگ لوٹ ایں کہ کسے پہ بلوچ بوگ ءِ نام ءَ توار کنت شمارا پاد آھگ لوٹ ایت۔
