کراچی: سندی راجدوستیں سروک استاد ھدایت لوھار ءِ ریاستی ادارھانی دست ءَ ناھکیں کوش ءُ سندی سیاسی باسکانی زوریں بیگواھی ءِ بگیری ءَ سند ءِ بنجاھی شھر کراچی ءَ وائس پار مسنگ پرسن آپ سند ءِ سروک ءُ شھید ھدایت لوھار ءِ جنک سورٹ لوھار ءَ زھرشانی ءَ تران کرتگ ءُ گوشتگ کہ پاکستا نی لشکر ءُ چیریں ادارہ اے گپ ءَ سرپد بوگ ءَ نہ اَنت کہ آیاں بلوچستان ءِ تہ ءَ کجام جاور ودی کرتگ اَنت۔
آئی ءَ گوشتگ کہ بلوچ پہ وتی سرڈگار ءُ مڈیانی پھریزگ ءَ جنگ کنگ ءَاَنت۔ ھما مردم کہ پہ سرڈگار ءُ مڈیانی پھریزگ ءَ جنگ کنت گڑا آ وتی ھوناں ریچ ایت ءُ جان ءِ دیمونی ءَ دنت۔ آ ھمے سرپد بیت کہ اے منی سرڈگار اِنت ءُ ما ایشی ءِ واھند ایں۔
سورٹ لوھار ءَ گوشتگ کہ مردمی ھکانی گل ءُ میان استمانی ادارہ دلگوش ءَ گور بہ کن اَنت کہ در آمدیں پنجاپی آتکگ ءُ مئے سر ءَ زوراکی کنگ ءَ اِنت۔ آ مئے گساں بیڑ برگ ءُ مارا جنگ ءَ اَنت مارا ھمے گوشگ ءَ اَنت کہ شما ھک ءِ گپ ءَ مکن اِت۔
