شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5443 روچ سرجم بوتگ۔ آدینگ ءِ روچ ءَ بی ایس او ءِ پیشیگیں سرکماش مھیم ھانءُ کارگشاد سمند ھان، مکبول، کبیر ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ داں مرچی ءَ بلوچستان ءَ ھمک روچ ژانگولیں لاش دزکپگ ءَ اَنت۔ اے میان ءَ بلوچستان ءَ بیست ھزار ءِ نزیک ءَ ژانگولیں لاش دزکپتگ اَنت۔ ما پہ شک نہ بلکیں پہ دلجمی گوش ایں کہ اے کار لشکر ءُ چیری ادارھانی اَنت۔ نوں کسھانی وھد نہ اِنت راستی ءَ گوں مردمانی زندگی ءَ گوازی کنگ بوگ ءَ اِنت۔
ماما کدیر گوشتگ کہ آمیدگس ءِ تہ ءَ آیاں گوشتگ کہ ما وتی ھمبلانی کشندھاں چون بہ کش ایں۔ اے چہ یک دھکے ءَ بلوچ چکچینی کنگ ءَ پد اولی رند اِنت جست ءُ پرس ءِ میان ءَ چیریں ادارھانی نیمگ ءَ اے گپ گوشگ بوتگ۔ نوں پاکستان ءَھوار درسیں جھان ءِ دیم ءَ پدر اِنت کہ آ بلوچستان ءِ تہ ءَ ودی بوتگیں رستری جاوراں کجام وڑ ءَ گوں سنگینی ءَ چارگ ءَ اَنت۔
ماما کدیر دیمتر ءَگوشتگ کہ بلوچستان ءِ انوگیں جاوراں چار ئے ھمے گندگ بیت کہ ریاست پہ وتی زورگپتی ءُ کالونیل شونداتانی برجاہ دارگ ءَ ترندی کنگ ءَ اِنت۔ بلوچستان ءَ راجی جنز ءِ میان ءَ ریاست ناشرکاری کنگ ءُ مردماں آوار جنگءُ آزار دیگ ءَ اِنت، لاشانی چگل دیگ ءِ درچ چہ چنچو سالاں برجاہ اِنت۔
