اسلام آباد: نیشنل پریس کلب ءَ بلوچ نودربراں پریس کانپریس کرتگ ءُ گوشتگ کہ پیروز ء نوربکش ایرڈ ایگریکلچر زانشتجاہ راولپنڈی ءِ نودربر اِنت، آ یازہ مئی 2022 ءَ بیگاہ ءِ چار ءَ چہ زانشتجاہ ءَ کتابجاہ ءَ روگ ءَ بوتگ کہ زور بیگواہ کنگ بوتگ۔ پیروز ءِ زوریں بیگواھی ءَ یازدہ مئی ءَ دو سال سرجم بیت۔ اے دو سالانی میان ءَ آمیدگس ءِ دروازگ پہ انساپ ٹک اتگ، جتائیں جاھاں زھرشانی کرتگ، گوں زانشتجاہ ءِ واکدار ءَ گپ کرتگ بلے داں مرچی ءَ پیروز ءِ باروا مارا ھچ وڑیں سرپدی دیگ ءَ نہ اَنت۔
آئی ءِگوشگ اِنت کہ ھمے وڑ ءَ ایرڈ ایگریکلچر زانشتجاہ راولپنڈی ءِ دگہ یک نودربرے اھمد جان کہ آ پیروز ءِ ھم تبک اِنت، آ بلوچستان ءِ شھر تربت ءِ بنجاھی شھر ءَ زور بیگواہ کنگ بوتگ ءُ اھمد ءِ باروا ھچ وڑیں ھال نیست۔
نودربراں گوشتگ کہ ما درس سرپد ایں اے وھد ءَ زوریں بیگواھی پہ بلوچ راج ءَ مزنیں جیڑھے۔ گوستگیں دو دھک اِنت کہ ریاست ءِ درسیں ادارہ بلوچ ورنایانی زوریں بیگواھی ءَ ھوار اَنت۔ بلوچستان ءَ چوشیں روچے نیست کہ یک بلوچے زور بیگواہ کنگ مہ بیت۔ ھمے جاورانی پژدر ءَ بلوچ نودربر چہ بلوچستان ءَ پنجاپ ءَ وانگ ءَ کاینت گڑا نشان کنگ ءُ ترسینگ بنت۔ تیوگیں بلوچ نودربر چہ ھمے جاوراں سسائی نادراہ اَنت ءُ شریں وڑے ءَ ونت کنگ ءَ نہ اَنت۔ اے درس یک شوربندی یے ءِ بنیاد ءَ کنگ بوگ ءَ اَنت، آیانی مول ھمیش اِنت بلوچ نودربر چہ زندگی ءُ وانگ ءِ ھک ءَ زبھر بہ بنت۔
آئی گڈی ءَ گوشتگ کہ ما درساں گوشگ لوٹ ایں کہ بلوچ اسٹوڈنس کونسل اسلام آباد نو مئی ءَ پنچ شمبے ءِ روچ ءَ پنجاپ ءِ جتائیں وانگجاھانی نودربرانی ترسینگ ءُ زوریں بیگواھیانی بگیری ءَ پنتاک بھر ءُ پانگ کنت۔ آدینگ ءِ شپ ءَ چاگردی رسانکدر ءِ تندجاہ ایکس ءَ اسپیسے برجم دار ایت ءُ یازدہ مئی ءَ روانک کش ایت ءُ زھرشانی کنت۔ چہ ایشی پد چاگردی رسانکدر ایکس ءَ زوریں بیگواھی ءُ نودربرانی ترسینگ ءِ بگیری ءَ تکشامے بندات کنت۔
