ڈیرہ گازی ھان/ مشکے: زورگریں پاکستانی لشکر ءُ چیریں ادارھانی کارمنداں سے مردم آوار جتگ ءُ بیگواہ کرتگ۔
اھوالکار ءِ رد ءَ چہ ڈیرہ گازی ھان ءَ زور بیگواہ کنگ بوتگیں مردمانی نام برکت ء الی ءُھپیز الی ء مھمد الی اِنت کہ منروتھرانی تلءِ جاہ منند اَنت۔ اے دوئیں مردم زی چہ ڈیرہ گازی ھان ءِ ٹریپک چاراہ ءَ آوار جنگ ءُ بیگواہ کنگ بوتگ اَنت۔
آیانی بارو ءَ گوشتگ بوگ ءَ اِنت کہ دوئیں یکیں کھول ءِ مردم اَنت تیل ءَ باپاری ءَ بوگ اَنت۔ برکت چہ ایشی پیش ھم یک رندے آوار جنگ ءُ بیگواہ کنگ بوتگ یک ھپتگےءِ زوریں بیگواھیءَ پد یل کنگ بوتگ۔
ھمے وڑءَ زی آوارن ءِ ھند مشکے ءَ زورگریں پاکستانی لشکر ءُ چیریں ادارھانی کارمنداں بشیر نامیں مردمے آوار جتگ ءُ بیگواہ کرتگ۔ زور بیگواھیں بشیر ء مولابکش مشکے ءِ میتگ لاکی ءِ جاہ منند اِنت زی چہ گورکائی ءَپاکستانی لشکر ءَ آوار جتگ ءُ بیگواہ کرتگ۔
زوربیگواھیں بشیر چہ ایشی پیش ھم بیگواہ کنگ ءُ پد ءَ یل کنگ بوتگ۔
