تربت: گلی بلیدہ ءِ جاہ منند آرپ گلام، زور بیگواھیں مسلم آرپ ءِ پت، زور بیگواھیں نسرم پیربکش ، پزیر گنی ءُ پتہ میار ءِ سیاداں بلوچ یکجھتی کمیٹی ءِ سروک ملا سبگت اللہ شاہ جی ءِ ھمراھی ءَ تربت پریس کلب ءَ پریس کانپریس کرتگ ءُ گوشتگ کہ مسلم آرپ آئی امر پانزہ سال اِنت آ 15 جون 2023 ءَ روچ ءِ دہ ءَ پاکستانی ادارھانی کارمنداں چہ دکان ءَ آوار جتگ کہ انگت ءَ آئی ھچ وڑیں ھال نیست چون ءُ کج ءَ اِنت۔ پاکستان ءِ راھبند ءِ رد ءَ یک کسانیں شھری یے اے وڑ ءَ آوار جنگ ءُ بیگواہ کنگ درکانودی کارے، جست ھمے ودی بیت کہ پہ بلوچاں کانود ءُ راھبند نیست یا مارا اے ڈیھ ءَ ایمنیں وڑے ءَ وانگ ءِ ھک نیست، اگاں ھست گڑا ما گوشگ بہ بہ ایں۔ منی پچ مسلم آرپ یک کسان سالیں زھگے آ اے ڈیھ ءِ بگیری ءَ ھچ وڑیں کاراں گوں نہ بوتگ۔
آئی ءَ گوشتگ کہ ھمے وڑ ءَ منی ناکو زتک نسرم پیربکش ءُ پزیر گنی 12 اکتوبر 2023 ءَ شپ ءِ سے ءَ چہ گس ءَ دزگیر کنگ بوتگ اَنتءُ گس ءِ درسیں موبائل پون ءُ پرپٹ آیانی ھمراھی ءَ برگ بوتگ اَنت۔ ما پہ وتی آزیزانی آجوئی ءَ مدام ادارھانی کر ءَ شتگ ایں ءُ وتی وس ءَ باز وزیر، مشیر، چاگردی سروک، میڈیا ءُ آمیدگس ءَ شتگ ایں، بلے انگت ءَ ھچ وڑیں گامگیج زورگ نہ بوتگ۔
آئی گوشتگ کہ ما رسانکدر ءِ رد ءَ چہ ڈیھ ءِ آمیدگس ءُ درسیں کانود ءِ پھازداریں ادارھاں لوٹ کن ایں کہ مئے زور بیگواھیں مردمانی آجوئی ءَ دلجمی بہ دے اَنت، ما مدام ھمے گپ جتگ کہ اگاں مئے آزیز چونیں درکانودی یا ریاست ءِ بگیری ءَ کاراں ھوار اَنت گڑا آیاں وتی آمیدگس ءَ پیش بہ کن اِت۔
آئی ءَ گوشتگ کہ اے وڑ ءَ مئے زھگانی سالاں زور بیگواہ کنگ ءُ کھولاں ھال نہ دیگ نہ تیوک ءَ بژنی گپے بلکیں سکا دردناک اِنت۔ زوریں بیگواھی نہ تیوک ءَ ڈیھ ءِ کانود بلکیں میان استمانی کانود ءِ تچکی ءَ بگیری اِنت۔ پمیشکا ما گوں بنجاھی واکداراں لوٹ کن ایں کہ پہ مئے زور بیگواھیں زھگانی آجوئی ءَ دلجمی بہ دے اَنت۔
آئی ءَ جارجتگ ءُگوشتگ کہ اگاں داں دہ روچ ءَ مئے زور بیگواھیں زھگ دیم ءَ آرگ نہ بوتگ اَنت کھول چہ بلیدہ ءَ داں تربت ءَ روانکے کش ایت، روانک تربت ءَ سر بوت گڑا وتی آھوکیں گامگیج ءِ جار ءَ جنت۔
