شال: پہ زور بیگواھیں مردمانی آجوئی ءَ برجاھیں زھرشانی گدان ءَ 5436 روچ سرجم بوتگ۔ یک شمبے ءِ روچ ءَ پی ایس ایپ ءِ سرکماش اسد، زانشتجاہ ءِ سرکماش جیوار بگٹی، سمی بگٹی، مھمد ھان ترین ءُ اسد بگٹی پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگءُ گوشتگ کہ بلوچستان ءَ پاکستانی چیریں داراہءُ لشکر ءِ زوراکیاں درس سرپد اَنت کہ کجام وڑ ءَ مسلمانی ءِ پوشاک ءِ تہ ءَ ھمک روچ بلوچ ورنا ءُ کماشاں آوار جنگ ءُ بیگواہ کنگ ءَ پد آزارداتگیں لاش چگل دیگ ءَ اَنت۔
ماما کدیر گوشتگ کہ مرچی دامگ، مشینی آسراتیانی وھد اِنت بلے بلوچ ھزارانی کچ ءَ زور بیگواہ ءُ شھید بوگ ءَ اَنت انگت جھان بے توار اِنت۔ بلوچ ءَ مرچی کجام راج یا ریاست ءِ گون ءَ لوٹ نہ کرتگ بلکیں جھان ءِ ھما جوڑ بوتگیں کانود ءِ رد ءَ اکوام متھدہ ءِ راھبند ءِ پارست ءَ بلوچ چکچینی ءِ درگت ءَ گوں میان استمان ءَ پریات کنگ ءَ اَنت کہ وتی جوڑ کرتگیں کانود ءِ ھیالداری ءَ بہ کنت۔ بلوچ چہ بازیں آزار ورگ ءَپد انگت ءَ ایردستی ءِ بگیری ءَ جھد کنگ ءَ اَنت۔
