شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5434 روچ سرجم بوتگ۔ آدینگ ءِ روچ ءَ بی ایس او ( پجار ) ءِ کمک سرکماش بابل ملک، بنجاھی پتر ءِ باسک ایم جے، سول سوسائٹی ءِ مردم، وکیل ءُ آدگہ پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچ پسگانی دیمونی گوستانک ءِ تہ ءَ مدام گیر آرگ بنت۔ بلوچ پسگانی پرایمنیں جھد ءُ دیمونیانی برورد اِنت کہ مرچی بلوچ راج پاکستان ءِ لٹ ءُ پلی شوربندیانی گوں جوانمردی ءَ دیم پہ دیمی ءَ کنگ ءَ اَنت۔
آئی گوشتگ کہ چہ پر ایمنیں جھد ءَ ترس آماچ بوتگ ءُ پاکستان وتی ناشریں کاروائی، بلوچ پسگانی زوریں بیگواھی ژانگوکیں لاشانی چگل دیگ،
لس آبادیانی سر ءَ بمبگواریاں ابید بلوچ ءِ پر ایمنیں جھد نزور کرت نہ کرتگ۔
ماما کدیر گوشتگ کہ بولان، کلات ءُ مکُران ءَ پاکستانی لشکر ءِ زوراکی انگت ءَ برجاہ اَنت۔ لس بلوچ کماش، جنین ءُ زھگاں زور بیگواہ ءُ شھید کنگ ءَ اِنت۔ اے جاورانی تہ ءَ میان استمان ءِ پاکستان ءِ مالی کمک سکا بژنی گپے۔ چہ ایشی پاکستان بلوچستان ءِ تہ ءَ وتی ناشریں کاروائیاں گیش کنت۔
آئی ءَ گوشتگ کہ جھان بلوچستان ءَ برجاھیں چکچینی ءِ دارگ ءَ وتی کرد ءَ پیلو بہ کنت، مردمی ھکانی پدجنوکیں گلانی زمہ واری بیت کہ بلوچستان ءِ انوگیں جاورانی بارو ءَ بہ چار اَنت کہ پاکستان ءَ مردمانی زندمان ھر پیم ءَ جنجال کرتگ اَنت۔ آ وتی زمہ واریاں پیلو بہ کن اَنت ءُ پاکستان ءِ ناشرکاریانی بگیری ءَ توار چست بہ کن اَنت۔
