کراچی: سندی راجدوستیں باسک بشیر شر، یوسپ شر ءُ دریا ھان برھمانی ءَ ھوار درسیں زور بیگواھیں سندی راجدوستیں باسکانی بیگواھی ءِ بگیری ءَ جئے سند اسٹوڈنٹس پیڈریشن، جسکم، وائس پار مسنگ پرسن آپ سند ءُ سند سجاگی پورم ءِ جار ءِ پد ءَ تیوگیں سند ءَ زھرشانی کنگ بوتگ۔
سند ءِ بنجاھی شھر کراچی ءَ سند ءِ راجدوستیں گلانی نیمگ ءَ چہ ریگل چاراہ ءَ داں کراچی پرس کلب ءَ زھرشا نی راونکے کشگ بوتگ، زھرشانی ءَ سارنگ جویو، سھنی جویو، مرک شر، اروج برھمانی، سئید چانڈیو، آئشہ سرگانی ءُ آدگہ مردماں بازیں کچے ءَ بھر زرتگ۔
آیاں تران کرتگ ءُ گوشتگ کہ پاکستان ریاست سند ءُ بلوچستان ءَ مردمی ھکاں لگتمال کنگ ءَ اِنت، گوستگیں یک ھپتگے ءَ چہ سند ءَ چار ءَ گیش راجدوستیں سیاسی باسک آوار جنگ ءُ زور بیگواہ کنگ بوتگ اَنت۔ آیانی تہ ءَ بشیرشر، یوسپ شر ءُ دریا ھان برھمانی ھوار اَنت۔ گوستیں ھپت سالانی میان ءَ چہ تیوگیں سند ءَ پنچ سد ءَ گیش راجدوستیں باسک زور بیگواہ کنگ بوتگ اَنت۔
آیاں گوشتگ کہ ما گوں اکوام متھدہءُ ایمنسٹی انٹرنیشنل ءَ ھوار جھان ءِ درسیں مردمی ھکانی ادارھانی گون ءَ لوٹ کن ایں کہ آ سند ءَ مردمی ھکانی لگتمالی، زوریں بیگواھی ءُ چکچینی ءِ بارو ءَ دلگوش ءَ گور بہ کن اَنت۔
آیاں گوشتگ کہ دانکہ بشیر شر ءِ ھواری ءَ درسیں سیاسی باسک یل کنگ نہ بوتگ اَنت مئے زھرشانی نندانک برجاہ بیت۔
دومی نیمگ ءَ ھیدر آباد، پڈآئیدن، نوشھرو پیروز، گھوٹگی، امرکوٹ، کمبر شھداد کوٹ، ھیرپورمیرس ءَ ھوار سند ءِ دگہ ھم بازیں شھراں زھرشانی کنگ بوتگ۔
