کراچی: گوستگیں روچاں چہ کراچی ءَ زورگریں پاکستانی لشکر ءِ دست ءَ زور بیگواہ کنگ بوتگیں راجدوستیں سیاسی باسک بشیر شر، یوسپ شر، دریا ھان برھمانی ءُ آدگہ زور بیگواھیں مردمانی یل نہ کنگ ءِ بگیری ءَ سرجمیں سند ءَ زھرشانی کنگ بوتگ۔
وائس پار مسنگ پرسن آپ سند ءُ سند سجاگی پورم ءِ نیمگ ءَ کراچی پریس کلب ءُ ملیر پریس کلب ءِ دیم ءَ زھرشانی کنگ بوتگ۔ زھرشانی ءَ سند سجاگی پورم ءِ سروک سارنگ جویو، وی ایم پی ءِ سروک سھنی جویو، جئے سند راجی پارٹی ءِ سروک نواز ھان زنئو ءُ زوربیگواھیں مردمانی کھولاں بھر زرتگ۔
آیاں تران کرتگ ءُ گوشتگ کہ بشیر شر ءُ دریا ھان سند ءِ سیاسی باسک اَنت آیاں ءَ پاکستانی لشکر ءِ جوڑ کرتگیں چیریں ادارھانی کارمنداں آوار جتگ ءُ بیگواہ کرتگ اَنت۔ سندی راجدوستیں سیاسی باسکانی بگیری ءَ لشکرکشی سندی راج ءِ چکچینی اِنت۔ ما ھمے لوٹ ءَ کن ایں کہ سند ءِ درسیں سیاسی باسک یل کنگ بہ بنت۔
ھمے وڑ ءَ نوشھرو پیروز، پڈن آئیدن ءُ پکاچانگ ءَ جسکم ءِ نیمگ ءَ زھرشانی کنگ بوتگ ءُ میر پور ماتھیکو ءَ راجدوستیں باسکانی نیمگ ءَ زھرشانی کنگ بوتگ۔
