بلوچ نودربر گل ( بی ایس او) ءِ بنجاھی جارکش ءَ وتی شنگ کرتگیں درشانے ءَ گوشتگ کہ بلوچستان ءِ تیاپ دپی شھر گوادر ءَ کشت ءُ کشاری ڈگاراں پہ پھازداری ءِ نام ءَ ٹٹ کنگ ءُ ھندی زمینداراں پہ نان ءَ چمدار کنگ ءُ بلوچان ءَ ھمے پیش دارگ ءَ اِنت کہ آزورگپتیں ھندے ءَ زندگی کن ءَ اَنت۔
آئی گوشگ اِنت کہ گوستگیں سالاں گوادر ءَ سیپ سٹی ءِ نام ءَ یک شوربندی یے بندات کرتگ ایشی تچکیں مول بلوچ ءِ مڈیانی لٹ ءُ پل ءِ تیز کنگ اِنت۔ اے سیپ سٹی ءِ شوربندی ءِ پارست ءَ گودر شھر ءِ چاریں نیمگاں ٹٹ کنگ ءُ بند کنگ بوتگ، بلے بلوچ سیاسی گل ءُ بلوچانی شریں وڑے ءَ گھگیری ءَ پد اے شوربندی سوبیں نہ بوتگ ءُ نوں تیوک ءَ یک ھندے ءَ اودءَ گیشتر کشار ھست ءُ ھندی مردمانی روزگار ءِ بنشون اِنت، آئی ءَ پہ پھازداری ءِ نام ءَ ٹٹ کنگ ءُ بند کنگ ءَ اِنت۔
آئی ءِ دیمتر ءَ گوشگ اِنت کہ گوادر ءِ وتگڑیں سوبائی اسمبلی ءِ باسک ٹٹ ءِ درگتءَ دیوان ءَ ساڑی بوتگ ءُ ھمے ناشریں کار ءَ تچکی ءَ ھوار بوتگ۔ بی ایس او ریاستی سرکار، وتگڑیں جھگیرءُ وتگڑیں استانی سرکار ءَ کڈن کنت کہ اے شوربندی ءَ زوت بند بہ کنت اگاں نہ گوں ترندی ءَ لس مردمانی گون ءَ پہ ایشی بگیری ءَ پاد آھگ ءَ جاڑیگ ایں۔
