کراچی: پاکستانی لشکر ءِ جوڑ کرتگیں چیریں ادارھانی کارمنداں سندی راجدوستیں باسکے آوار جتگ ءُ بیگواہ کرتگ۔
اھوالکار ءِ رد ءَ زور بیگواھیں سندی راجدوستیں باسک ءِ نام بشیر شر اِنت کہ مرچی کراچی ءِ ھند بٹائی آباد ءَ آوار جنگ ءُ زور بیگواہ کنگ بوتگ۔ بشیر شر 2020 ءَ ھم آوار جنگ ءُ زور بیگواہ کنگ بوتگ، چہ سے ماہ ءَ پد زوریں بیگواھی ءَ آجو بوتگ ءُ داں دو سال ءَ زندان ءَ بند کنگ بوتگ۔ رند ءَ پہ مانزمانی یل کنگ بوتگ۔
بشیر شر ءِ زور بیگواھی ءِ بگیری ءَ سند ءِ جتائیں راجدوستیں گلاں باندا کراچی ءَ ھوار سند ءِ جتائیں شھراں زھرشانی کنگ ءِ جار جتگ۔ آئی کھول ءِ نیمگ ءَ کراچی سچل پولیس گس ءِ دیم ءَ زھرشانی نندانک برجاہ اِنت۔
