سندھودیش روولیوشنری آرمی (ایس آر اے ) ءِ سروک سید ازگرشاہ ءَ مرچی سندی سروک سائیں جی ایم ءِ بیرانی ءِ بیست ءُ نھمی سالروچ ءِ درگت ءَ وتی کلوھے شنگ کرتگ ءُ گوشتگ کہ سائیں جی ایم سید ءِ نوکیں راجدوستی ءِ لیکہ سندی راج ءِ آجوئی، وشھالی ءُ وشیں باندات ءِ مانزمان اِنت۔ آ ھمے لیکہ ءِ سر ءَ وتی درسیں راستی، ایمانداری ءُ پہ دیمروئی ءِ بابت ءَ اوشتاتگ ءُ گوں وتی یکشلیں جھد ءَ سندھودیش ءِ آجوئی ءِ دلجمی داتگ۔
ایس آر اے ءِ سروک ءَ گوشتگ کہ ایرستی چوناھا یک ایردستی یے۔ بلے ماتیں سرڈگار سند ءِ سر ءَ ھپتاد ءُ ھپت سالانی پاکستان ءِ زورگپتی گوستگیں چہ درسیں ایردستیاں ترسناک اِنت ءُ ناگیگیں دروشمے ءَ مئے دیم ءَ اِنت۔ مئے سرڈگار، راجی ھستمان، دودمان، زبان، کور ءُ دریا زمین درساں برگ ءَ اِنت۔ مئے زمین، کوہ، دریا ءُ آدگہ مڈیاں لٹ ءُ پل کنگ ءُ چین ءَ ھوار آدگہ شرکتانی کِر ءَ بھا کنگ ءَ اِنت۔ باسمائیں شوربندی یے ءِ بنیاد ءَ پنجاپیاں ھوار آدگراں آباد کنگ ءُ مارا وتی سرڈگار ءِ سر ءَ گوں کمیناں مٹ کنگ ءَ اِنت۔
سید ازگر شاہ ءَ گوشتگ کہ ریاستی سروکی ءَ مھکمیں وڑے ءَ ناشرکاری ءِ دام ءَ چیر دیگ ءُ سند ءِ چہ کرناں کوھنیں دین ءَ ھلاس کنگ، ھندوانی زھگاں آوار جنگ ءُ پہ زور دین ءِ مٹ کنگ آیاں چہ سند ءَ لٹ ءُ بار کنگ ءَ لاچار کنگ ءَ اِنت۔ سند ءِ چہ ایشی ءَ رکینگ ءُ پدریچ ءِ دو دیمی جنگ ءَ مارا تیوک ءَ سائیں جی ایم سید ءِ راجی لیکہ رکینت کنت۔
ایس آر اے ءِ سروک ءَ گوشتگ کہ سائیں جی ایم سید وتی گڈی موکلی گوشتانک ءَ گوں سندی راج ءَ دلگوش گور کرتگ ءُ گوشتگ اَت کہ سندی راج ءَ گوں ھورتچاری ءَ دیم ءَ جنزگ ءُ جھد کنگ لوٹ ایت۔ چی ءَ کہ آجوئی ءُ انساپ کدی پہ ھیرات ءُ بے سمائی ءَ نہ رس ایت۔ اگاں منی گپ ءَ گوش بدار اِت ءُ ھمت بہ کن اِت من چہ وتی زانت ءَ سدکاں کہ سند ءُ سندی راج چہ اے ناگیگیں جاوراں درکپگ ءَ سوبین بنت۔
ازگر شاہ ءَ گوشتگ کہ مرچی من شمارا درسان ءَ چہ برز ءُ کوھیں سرڈگارے ءَ توار کنگ ءَ آں کہ اگاں شما سند ءِ آھوکیں چہ درسیں ترس ءُ شرتگاں سما بہ کن اِت ءُ اے وڑ ءَ بہ مار اِت انچوش کہ من مارگ ءَ آں پد ءَ شما الم سوبین بہ اِت۔ دومی نیمگ ءَ ترس، جانبڈ ءُ لالچی ئیں راج ءُ مردمانی گوستانک ءَ ھوار بوگ ءِ آسر ترسناک بیت۔
ایس آر اے ءِ سروک ءَ گوشتگ کہ ایس آر اے چہ بنداتی روچاں بگر داں مرچی سائیں جی ایم سید ءِ لیکہ ءُ شوربندی زرتگ ءُ جھد برجاہ داشتگ، بیا اِت مرچی سائیں جی ایم سید ءِ بیست ءُ نھمی بیرانی ءِ سالروچ ءِ درگت ءَ ھمے لیکہ ءُ شوربندی ءِ وپا کنگ ءِ کول ءَ بہ کن اِت سندی راج ءُ سندی ورنا ایس آر اے ءَ کمک بہ کن اِت ءُ جھد ءِ تیز کنگ ءِ کلوہ ءَ بدے اِت۔
