شال: پہ زور بیگواھیں مردمانی پدجنگ ءَ زھرشانی گدان ءَ 5426 روچ سرجم بوتگ۔ پنچ شمبے ءِ روچ ءَ چہ مچ بولان ءَ سیاسی ءُ چاگردی کارکن نبی بکش، سلام ءُ آدگہ مردم پہ ھمدری درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ زوریں بیگواھی ءُ ژانگولیں لاشانی چگل دیگ، سیاسی کارکنانی نشانگ کنگ، آبادیانی سر ءَ اُرش کنگ زورگریں ریاست ءِ نیمگ ءَ ھمک روچی کارے۔ بلے بلوچ راجی زرمبشت چہ اے چیزاں سرگوست گوں ترندی ءَ دیم ءَ جنزاں اِنت۔ ریاست ترس آماچ بوتگ ءُ زوراکی ءِ سیمسراں گواز کنگ ءَ اَنت۔
آئی ءَ گوشتگ کہ وی بی ایم پی ءِ رد ءَ چہ 2000 ءَ داں 2004 ءَ شست ءُ ھشت ھزار بلوچ زور بیگواہ کنگ بوتگ اَنت ءُ بندیگجاہ ءَ ھزار ءَ گیش مردم شھید کنگ بوتگ اَنت۔ زور بیگواھیں مردمانی یل نہ کنگ ءُ بندیگجاہ ءَ شھید کنگ ءِ بگیری ءَ زور بیگواھیں مردمانی کھول وی بی ایم پی ءِ راھنند ءَ گوستگیں پانزہ سال اِنت جھد کنگ ءَ اَنت۔
ماما کدیر گوشتگ کہ زھرشانی روانک، مراگش آمیدگس ءُ کمیشنانی پیش بوگ ءِ ھواری ءَ اے دراجکشیں زھرشانی شدکشیں گدان برجاہ اِنت، ایشی پہ بلوچستان ءِ بارو ءَ میان استمان ءِ دلگوش ءِ گور کنگ ءَ جوانیں کردے پیلو کرتگ۔ اے دراجکشیں ایمنیں جھد ءَ مردمی ھکانی ادارھاں ھوار اکوام متھدہ ءِ کرد ءِ سر ءَ بازیں جست ودی کرتگ۔
