روکپتی بلوچستان: چھبار جُنز ءِ سنگتانی نیمگ ءَ نمیرانیں سید زھور شاہ ھاشمی ءِ یات ءَ یک شمبے، 21 اپریل 2024 ءَ دیوانے برجم دارگ بوتگ۔ دیوان ءِ جارچین رھیم اھمد جدگال بوتگ۔
دیوان ءِ بُنگیج ءَ گْوشتانکی بھر ءَ میرجان میر ءَ بلوچی زبان ءِ وانگ ءُ زانگ ءِ باندات ءَ تران کرتگ، رند تارک ھُسین ھوت ءَ سید ھاشمی ءِ کتاب گسد گْوار ءِ لَچّہ پہ دیوان ءَ پیش کرتگ، مولابکش رئیسی ءَ سید ھاشمی ءِ لچّہ کاری ءِ جُھلانکی ءُ آئی ءِ لَچّھانی گْوستانکی ءُ ھیال ساچی(mythology)باندات ءَ گپ جتگ۔
مولابکش رئیسی ءَ رند ءَ گوں کریم باشندہ ءَ دیوان ءَ تْران کنان ءَ گُوشتگ کہ اگاں سید ھاشمی مہ بیت ایں بگندئے مروچی بلوچی زبان چو اے رنگ ءَ نہ بوتگ اَت۔
رند کریم باشندہ ءَ گوں برکت برجان ءَ دیوان ءَ تران کنانان گْوشتگ کہ سید ھاشمی ایوک ءَ لچّہ کارے نہ بوتگ آئی ءَ زبان ءِ دُراھیں تَک ءُ پھناتاں کار کرتگ۔
الی بکش دشتیاری ءَ سید ھاشمی ءِ کتاب گسد گْوار ءِ شاھیگانی ءِ باندات ءَ گپ جتگ۔ ھیسا کِک سوچی ءَ سید ءِ سید گنج ءِ باندات ءَ تْران کرتگ۔ ایوب ایران نژاد ءَ سید ھاشمی ءِ لچّہ کاری ءِ باندات ءَ گپ جتگ۔ بلوچی ءِ تامر ساچ ءُ سوجکار ایوب اپشار ءَ سید ھاشمی ءِ باندات ءِ باروا گپ جتگ۔
بانُک جَنّت بایگان ءَ گوں دیوان ءَ تْران کنان ءَ گْوشتگ کہ جنین بایدانت زند ءِ ھمک تک ءُ پھنات ءَ ھوار بہ بنت ءُ وتی جُھد ءَ دیم بہ بَرانت جنیناں ھِچّ نیمّونے پہ دیمروئی ءَ داشت نہ کنت۔
دیوان ءِ ساز ءُ زیملی بھر ءَ کامران نبی،وھید تَرکِش، وھید بلوچ نیسب،استاد مھمد الی ھسنی ، نسیم ھوت ءَ سید ھاشمی ءِ پِربند دیوان ءَ گوشتگ اَنت۔
دیوان ءِ گُڈسر ءَ بلوچانی نامداریں ازمکار ءُ بُت ساچ ھسن یادگارزادگ ءُ ماسٹر رشید ءَ سید ھاشمی ءِ بُت ءِ دیمدرائی کرتگ۔
