![](https://zrumbesh.com/wp-content/uploads/2024/04/24-01-28_18-08-15-205-1024x576.png)
شال: بیگواھیں بلوچانی توار ( وی بی ایم پی ) ءِ سرکماش نسر اللہ ءَ وتی شنگ کرتگیں درشانے ءَ گوشتگ کہ مستونگ ءَ نندانک ءَ نشتگیں زور بیگواھیں لتیپ بنگلزھی، اشپاک ءُ نوردین ءِ کھول ءِ گون ءَ گپ ءُ تران ءِ میان ءَ مستونگ ءِ دمگدار ءُ پاکستانی لشکر ءِ سروگان ءَ دلجمی داتگ کہ دو روچ ءِ اندر ءَ زور بیگواھیں مردماں آجو کناھین ایں یا آیانی بارو ءَ کھولاں سرپد کن ایں، چہ ایشی ءَ پد زور بیگواھیں مردمانی کھولاں وتی زھرشانی ھلاس کرتگ۔ بلے یک ھپتگے ءِ گوزگ ءَ ابید ھم چہ مستونگ ءَ زور بیگواھیں مردم نہ یل کنگ بوتگ اَنت نہ کھولاں آیانی بارو ءَ سرپدی دیگ بوگ ءَ اِنت۔
آئی ءَ گوشتگ کہ دمگی واکدار ءَ یک ھپتگے بیت آ تیوک ءَ گوں کھولاں گند ءُ نند کنگ ءُ دروگیں دلبڈی دیگ ءَ اِنت۔
نسر اللہ ءَ گوشتگ کہ مستونگ ءِ دمگدار ءُ پاکستانی لشکر ءِ سروگان گوں بیگواھیں مردماں وتی کرتگیں کھولاں پیلو بہ کن اَنت۔ اگاں نہ وی بی ایم پی زور بیگواھیں مردمانی کھولانی ھواری ءَ شال کراچی شھدگ ءَ نندانک دنت ءُ زھرشانی کنت۔ ایشی زمہ وار مستونگ ءِ دمگدار ءُ پاکستانی لشکر ءِ سروگان اَنت۔