کیچ: دوشی یک رندے پد ءَ زور بیگواھیں نئیم رھمت ءِ کھول ءِ نیمگ ءَ برجاھیں زھرشانی نندانک ءَ نشتگیں مردمانی گاڑی ءِ سر ءَ لگت دیگ جھد کنگ بوتگ۔
اھوالکار ءِ رد ءَ زور بیگواھیں نئیم رھمت ءِ کھول ءِ نیمگ ءَ اے دومی رند اِنت کہ سی پیک دگ ءَ زھرشانی نندانک برجاہ اِنت دو روچ ءِ گوزگ ءَ پد ھم واکدارانی نیمگ ءَ ھچ وڑیں گامگیج زورگ نہ بوتگ۔ زھرشانی نندانک ءَ نشتگیں جنین ءُ زھگ بیھار دیگ بوتگ اَنت۔
انچوش گوشگ بوگ ءَ اِنت کہ گاڑی وتگڑیں سیاسی پارٹی ءِ سروک یا کارکنے ءِ بیت کہ آئی نمبر پلیٹ ءَ پاکستان پیپلز پارٹی ءِ بیرک جنوک بوتگ۔ زھرشانی ءَ نشتگیں مردماں درسیں جیڑھانی بارو ءَ گوں ھندی واکداراں گپ جتگ بلے چہ ایشی ءَ پد ھم زھرشانی ءَ نشتگیں مردمان ءَ پھازدار دیگ نہ بوتگ۔
ھندی بنشونے ءِ رد ءَ شاپک ءَ پہ برجاھیں زھرشانی نندانک ءِ نزور کنگ ءَ مردم چہ کِر ءُ کشاں راہ درگیجگ ءُ وتی گاڑیاں گوازینگ ءَ اَنت۔ چی ءَ کہ زھرشانی ءَ نشتگیں مردمانی کچ کم اِنت۔
زھرشانی ءَ نشتگیں مردم مدام چہ کِر ءُ کشانی ھند ءِ مردمانی گون ءَ دزبندی کنگ ءَ اَنت بیا اِت ءُ مئے گون ءَ کمک بہ کن اِت۔
یات بہ بہ اِت کہ چہ ایشی ءَ پیش ھم زور بیگواھیں نئیم رھمت ءِ کھول ءِ زھرشانی نندانک ءَ نشتگیں مردمانی لگت دیگ ءِ جھد بوتگ ءُ جنین ءُ زھگ لٹ شاپ کنگ بوتگ اَنت۔
