شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5424 روچ سرجم بوتگ، سے شمبے ءِ روچ ءَ چہ شال ءَ پی ٹی ایم ءِ کلانھیں کارکن پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ اپریل ءِ ماہ ءَ چو آدگہ ماھانی وڑ ءَ ریاست ءِ زوراکی، لشکرکشی، ژانگولیں لاشانی چگل دیگ چیریں ادارھانی نیمگ ءَ برجاہ بوتگ اَنت۔ بلوچ راج ءِ سر ءَ ریاست وتی زورگپتی ءِ برجاہ دارگ ءَ زوراکیاں تیز کنگ ءَ اَنت۔
آئی ءَ گوشتگ کہ گوستگیں چنچو ماہ اِنت ریاستی ادارھانی کارپد ءُ پارلیمانی پارٹیاں درشاناں گنداں انچوش گمان بیت کہ پاکستان زوت بلوچستان ءِ تہ ءَ ٹوھیں لشکرکشی یے کنت۔ انچوش کہ چہ 2004 ءَ لشکرکشی ءُ بلوچ چکچینی گوں ترندی ءَ برجاہ اِنت۔
ماما کدیر گوشتگ کہ پاکستان ءِ چیریں ادارہ بلوچ پارلیمنٹ دوستانی کمک ءَ پہ بلوچ راجی زرمبشت ءِ نزور کنگ ءَ ھر پیمیں جھد ءَ کنگ ءَ اَنت۔ بلوچ ورنایانی زوریں بیگواھی ءَ پد آیاں بندیگجاہ ءَ شھید کنگ ءُ لاشاں جنگل ءَ چگل دیگ ءَ اَنت دانکہ بلوچ ورنا ترس آماچ بہ بنت ءُ چہ راجی زرمبشت ءَ دزکش بہ بنت، اے آیانی نابزانتی اِنت اے وڑ کدی بوت نہ کنت۔
آئی ءَ گوشتگ کہ ھمایاں 75 سال اِنت سر ءَ کپن بستگ ءُ دیم پہ دیمی کنگ ءَ اَنت، ھمے سرڈگار ءِ ھکی ئیں آشک اَنت کہ آ پہ وتی سرڈگار ءَ ھر پیمیں دیمونی دیگ ءَ چک ءُ پد نہ بنت۔ بلوچ پسگاں وتی کھولانی دیمونی داتگ بلے پشت نہ داتگ۔
