شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5423 روچ سرجم بوتگ کہ انگت ءَ برجاہ اِنت۔ دو شمبے ءِ روچ ءَ چہ ھزدار ءَ سیاسی ءُ چاگردی کارکن رجب الی، دین مھمد، نیاز ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءَ ھمک روچ یک نہ یک جاھے ءَ بلوچے ءِ ژانگولیں لاش دز کپ ایت اے یک دودے جوڑ بوتگ۔ داں انوں بیست ھزار ءِ نزیک ءَ مردمانی لاش دزکپتگ اَنت۔
آئی ءَ گوشتگ کہ ما اے گپ ءَ دلجمیں اے کار ءَ چیریں ادارھانی کارمند کنگ ءَ اَنت۔ سرکار ءُ چیریں ادارھانی کارمند سرپد بہ بنت کہ نوں بلوچ پہ چوشیں کسانیں گپانی سر ءَ بیسہ نہ کن اَنت۔ بس نوں یک مرگ ءِ لیبے برجاہ اِنت۔ ایشی مول ھمیش اِنت کہ مرگ انساپ ءِ چیدگ اِنت۔
ماما کدیر گوشتگ کہ آمیدگس ءِ جست ءِ پسو ءَ چیریں ادارھانی زمہ وارے ءَ گوشتگ کہ ما وتی ھمبلانی سر ءِ بروکیں مردماں چون بہ کش ایں۔ جھان ءِ گوستانک ءَ اولی رند ءَ آمیدگس ءِ دیم ءَ یک اداھے ءِ زمہ وار ءَ اے وڑیں گپ جتگ۔ پہ ایشی نہ تیوک ءَ جھان ھیران بہ بیت بلکیں ایشی بگیری ءَ گامگیج بہ زور ایت۔ اے جھان ءِ سر ءَ اِنت کہ اے وڑیں جاورانی سر ءَ چنچو سنگین بنت۔
