کراچی: بلوچ یکجھتی کمیٹی ( کراچی ) ءِ سروک لالا وھاب ءِ سروکی ءَسدیک گوٹ ملیر ءَ نمیرانیں کمانچر ءِ یات ءَ روانکے کشگ بوتگ، روانک ءَ مردماں بازیں کچے ءَ بھر زرتگ۔ مردماں نمیرانیں کمانچر ءِ اکسانی دیم ءَ ڈیوا بالینتگ ءُ ستک شانی ندر کرتگ۔
مردماں کمانچر ءِ زند ءُ کرد ءِ سر ءَ گپ جتگ ءُ گوشتگ کہ کمانچر بلوچستان ءِ کنڈ کنڈ ءَ تر ءُ گرد کرتگ ءُ اکس گپتگ مارا بلوچستان ءِ جتائیں ھند ءُ دمگ پیش داشتگ اَنت ءُ سرپد کرتگ۔ کمانچر نہ تیوک ءَ بلوچستان ءِ ڈگارانی پیش دارگ ءِ جھد کرتگ بلکیں آئی بلوچ ءِ بزگی ءُ جنجال مارا پیش داشتگ اَنت، کمانچر تنگدستیں مردمانی کمک کرتگ۔
ھمے وڑ ءَ کیچ ءِ بنجاھی شھر تربت ءَ نمیرانیں کمانچر ءِ یات ءَ روانکے کشگ بوتگ۔ روانک ءَ سیاسی ءُ چاکردی کارکن، شائر ءُ گشندہ جتائیں بھرگاں سیادی داروکیں مردماں بازیں کچے ءَ بھر زرتگ۔
مردماں نمیرانیں کمانچر ءِ اکسانی دیم ءَ ڈیوا بالینتگ ءُ ستک شانی ندر کرتگ۔ بلوچی زبان ءِ نامداریں گشندہ بیبگر بلوچ ءَ کمانچر ءِ یات ءَ سوت گوشتگ۔
