کراچی: بلوچ یکجھتی کمیٹی ( کراچی ) ءِ باسکانی گساں لشکر ءِ بیڑ برگ ءُ تیرگواری کنگ ءِ بگیری ءَ بی وائی سی (کراچی ) ءِ سروک آمنہ ءَ پریس کانپریس کرتگ ءُ گوشتگ کہ دوشی شپ ءِ یازدہ ءُ نیم ءَ ملیر ءِ ھند جلال مراد، شراپی گوٹ ءَ بلوچ یکجھتی کمیٹی ( کراچی ) ءِ باسکءِ گس ءَ رینجر، پولیس ءُ چیریں ادارھاں ھواری ءَ بیڑ برتگ ءُ تیوگیں ھند انگر کرتگ۔ وشبھتی ءَ مئے باسک گس ءَ ساڑی نہ بوتگ گڑا آئی برات ءُ گس ءَ ساڑئیں مردم ، مرد ءُ جنین لٹ شاپ کنگ بوتگ اَنت۔ آئی لوگبانک نہ تیوک ءَ جتگ ءُ ھونیگ کرتگ بلکیں آئی کسانیں زھگ چہ واب ءَ پادکرتگ ءُ لٹ شاپ کرتگ اَنت ءُ آئی برات ءِ سر ءَ وتاس ءِ بٹ جتگ ءُ سکا آزار داتگ۔ ھندی مردماں گھگیری کرتگ لشکر ءَ نہ تیوک ءَ جنین لٹ شاپ کرتگ اَنت بلکیں گراں کرتگ اَنت۔ سکا تیرگواری کرتگ ءُ مردم ترسینتگ اَنت اے سکا بژنی کارے۔
آئی ءَ گوشتگ کہ بی وائی سی ( کراچی ) ءِ باسک پیش ءَ ھم باز رند ءَ ترسینگ بوتگ اَنت، من ءَوت ءَ چنچو رند ءَ پون کرتگ ءُ بیھار داتگ، بلے زی رینجر ءُ چیریں ادارھانی کارمنداں سیمسر گواز کرتگ۔ ھمے وڑ کنگ ءُ ریاستی ادارہ وتی راستیں دروشم ءَ پیشدارگ ءَ اَنت۔ چہ اے زوراکیاں ما نہ ترس ایں ءُ نہ بے توار بہ ایں۔ ما اے ڈیھ ءِ شھری ءِ بستار ءَ راھبند ءُ کانود ءَ من ایںءُ راھبند ءِ سر ءَ سدک ایں۔ ما دلجمیں کہ آمیدگس ءَ انساپ دیگ بیت اگاں ما پریس کلبانی دیم ءَ آوارجنی ءُ دزگیری ءِ گپ ءَ کن ایں کہ اے جیڑہ گوں سنگینی ءَ چارگ لوٹ ایت۔
آمنہ ءَ گوشتگ کہ پاکستان ءَ زوریں بیگواھی ھنچو رواج گپتگ کہ نہ تیوک ءَ بلوچ بلکیں تیوگیں نزوریں راج ایشی آماچ اَنت۔ بلکیں چیریں ادارہ اے گپ ءَ شمشوکار اَنت کہ اے سکا مزنیں میارباری یے۔ مارا آوارجنی ءُ دزگیری ءِ بیم ءَ ترسینت نہ کن اَنت۔
آمنہ ءَ وتی پریس کانپریس ءَ گڈی ءَ گوشتگ کہ ما گوں ساپیں لبزاں گوشگ لوٹ ایں کہ مئے باسکاں ھواراچما کسے ءَ میارباری یے کرتگ آئی ایپ آئی آر ءَ پیش بہ کن اَنت بلے اے وڑ ءَ ما زوراکی ءَ اوپار نہ کن ایں۔جنین ءُ زھگانی لٹ شاپ ءَ نزور نہ بہ ایں۔ اگاں کراچی ءَ چونیں بلوچے ءَ چونیں تاوانے بوت ما وتی آھوکیں گامگیج ءِ جار ءَ جن ایں۔
