روکپتی بلوچستان ءِ دمگ شستون ءَ لبزانکی ءُ ربیدگی گل آتار ءِ نیمگ ءَ چہ باندا بلوچی کلاس بندات بنت۔
لبزانکی ءُ ربیدگی گل آتار ءَ وتی شنگ کُرتگیں جارے ءَ گْوشتگ کہ چہ باندا بلوچی سیاھگ ءِ راست نویسگ ءِ کلاس بندات بنت ءُ اے کلاس داں یک ماھے ءَ برجاہ بنت۔
جار ءِ تہ ءَ گْوشگ بیتگ کہ کلاس باندا بیگاہ ءِ پنچ ءَ بندات بنت ءُ پہ بلوچی زبان ءِ وانگ ءُ زانگ ءَ مردماں بازیں کچے ءَ وتی نام نبشتہ کُرتگ اَنت۔
یات بہ بہ اِت کہ چہ ایشی ءَ پیش ھم لبزانکی ءُ ربیدگی گل آتار ءَ شستون ءَ کلاس برجم داشتگ ءُ بلوچی زبان وانیتگ۔ابید چہ ایشی ءَ پیش ھم بلوچی دود ءُ ربیدگ ءِ روچ ھمے گل ءِ نیمگ ءَ برجم دارگ بیتگ اَت۔ کہ برجم داشتگیں مراگش ءَ بلوچی زبان ءِ کلانھیں لبزانکار استاد برکت برجان ءُ الی جما زامرانی ءَ ھوار بازیں لبزانکار، شائر ءُ نبشتہ کاراں بھر زُرتگ اَت ءُ ماں شستون ءَ یک گْوستانکی مراگشے ءِ بستار ءَ مدام گیر آرگ بیت۔
لبزانکی ءُ ربیدگی گل آتار ءَ یک سالے بیت کہ بلوچی زبان ءِ ورنائیں شائر،نبشتہ کار ءُ راجدوستاں جوڑ کُرتگ ءُ پہ بلوچی زبان ءِ دیمروئی ءُ بلوچی دودانی پھریزگ ءَ کار کنگ ءَ اَنت۔
