شال: چہ بلوچستان زانشتجاہ ءَ پاکستانی لشکر ءِ دست ءَ زور بیگواہ کنگ بوتگیں نودربر سھیل ءُ پسی ءِ یل نہ کنگ ءِ بگیری ءَ بلوچ وائس پار جسٹس ءِ نیمگ ءَ ماں چاگردی رسانکدر ءَ کمپینے برجم دارگ بوگ ءَ اِنت۔
بلوچ وائس پار جسٹس ءَ وتی شنگ کرتگیں درشان ءَ گوشتگ کہ یک نومبر 2021 ءَ چہ بلوچستان زانشتجاہ ءِ تہ ءَ زور بیگواہ کنگ بوتگیں نودربر سھیل ءُ پسی ءِ یل نہ کنگ ءِ بگیری ءَ چاگردی رسانکدر ایکس ءَ 21 اپریل 2024 ءَ بیگاہ ءِ ھپت ءَ داں شپ ءِ دوازدہ ءَ کمپینے برجم دار ایں۔
آئی ءَ گوشتگ کہ یک نومبر 2021 ءَ چہ بلوچستان زانشتجاہ ءِ تہ ءَ سھیل ءُ پسی زور بیگواہ کنگ بوتگ اَنت، پہ آیانی زوریں بیگواھی ءِ بگیری ءَ بلوچ نودربر گلاں دراجکشیں زھرشانی یے کرتگ ءُ وانگجاھاں وتی کلاساں نہ شتگ اَنت، اے میان ءَ پیشیگیں بلوچستان سرکار ءُ اپوزیشن ءَ ھواری ءَ پترے جوڑ کرتگ، آیاں گوں نودربراں گپ ءُ تران کرتگ ءُ آیان ءَ دلجمی داتگ کہ لھتیں روچاں دوئیں نودربراں یل کناھین ایں، بلے دو سال ءَ گیش وھد ءِ گوزگ ءَ ابید آ انگت ءَ یل کنگ نہ بوتگ اَنت۔
آئی ءَ گوشتگ کہ سھیل ءُ پسی ءِ دراجکشیں زوریں بیگواھی ءَ سرکاری ٹاپارانی بے سوبی ءُ پہ نودربرانی آجوئی ءَ21 اپریل ءَ ایکس ءَ آن لائن کمپینے برجم دار ایں۔
آئی ءَ گوں درسیں سیاسی ءُ چاگردی گل ءُ مردم، نودربر، اھوالکار، وکیل، مردمی ھکانی ءُ رسانکدری کارکنانی گون ءَ لوٹ کرتگ کہ آ اے کمپین ءَ بھر بزور اَنت ءُ پہ سھیل ءُ پسی ءِ آجوئی ءَ توار چست بہ کن اَنت۔
