کیچ: شاپک ءَ زور بیگواھیں نئیم رھمت ءِ کھول ءِ نیمگ ءَ برجاھیں زھرشانی نندانک ءَ مرچی چار روچ اِنت کہ انگت برجاہ اِنت۔ ترندیں ھوارانی گوارگ ءَ پد ھم آیاں وتی زھرشانی ھلاس نہ کرتگ۔
بنشون ءِ رد ءَ شمبے ءِ بیگاہ ءَ گاڑی ڈرائیوراں برجاھیں زھرشانی نندانک ءِ پروشگ ءِ جھد کرتگ ءُ لھتیں گاڑی پہ زور گوازینتگ۔ زھرشانی ءَ نشتگیں مردمان گھگیری کرتگ ءُ آدگہ گاڑی داشتگ اَنت۔
زھرشانی ءَ زور بیگواھیں نئیم ءِ کھول ءِ گوشگ اِنت کہ ما آئید ءِ روچ ءَ وتی زھرشانی بندات کرتگ ءُ مرچی مئے زھرشانی نندانک ءَ چار روچ سرجم بوتگ۔ مارا اد ءَ ھور ءَ بزگ کرتگ بلے چہ واکدارانی نیمگ ءَ مئے لوٹ ءِ گوش دارگ ءَ ھچ وڑیں گامگیج زورگ نہ بوتگ۔
زھرشانی ءَ نشتگیں کھول ءَ گوں شاپک ءِ کِر ءُ کشانی مردماں زھرشانی ءَ بھر زورگ ءِ لوٹ کرتگ ءُ گوشتگ کہ بیا اَنت ءُ مئے گون ءَ کمک بہ کن اَنت۔
اے درگت ءَ ھندی واکدار ءِ گوشگ اِنت کہ کھول زھرشانی نندانک ءَ ھلاس بہ کنت ءُ مارا لھتیں روچ ءِ وھد بہ دنت ما پہ نئیم ءِ یل کناھینگ ءَ جھد کن ایں۔
زور بیگواھیں نئیم رھمت ءِ کھول ءِ گوشگ اِنت دانکہ مئے زھگ یل کنگ نہ بوتگ ما وتی زھرشانی نندانک ءَ ھلاس نہ کن ایں۔
