کیچ ءِ ھند شاپک ءَ پاکستانی لشکر ءِ دست ءَ زور بیگواھیں نئیم رھمت ءِ کھول ءِ زھرشانی نندانک سے روچ اِنت کہ برجاہ اِنت۔ زھرشانی نندانک ءَ زھگ ءُ جنیناں ھوار سیاسی کارکن سبگت اللہ شاہ جی ءُ آدگہ مردماں بازیں کچے ءَ بھر زرتگ۔
زھرشانی ءَ نشتگیں کھول ءِ گوشگ اِنت کہ ما پہ نئیم ءِ آجوئی ءَ دمگدار ءِ کارگس ءَ شتگ ایں ءُ سی پیک ڈی بلوچ ءَ زھرشانی ءَ بندکرتگ۔ ھمک جاہ ءَ کہ مئے دست رستگ ما پہ وتی زھگ ءَ جھد کرتگ۔
آئی ءَ گوشتگ کہ اے ڈیھ ءَ را کانود ءُ آمیدگس ھست مئے زھگ ءَ آمیدگس ءَ پیش بہ کن اَنت ءُ آئی میارباری ءَ بہ گوش اَنت، دانکہ مئے زھگ یل کنگ نہ بوتگ ما وتی زھرشانی ءَ برجاہ دارایں۔
کھول ءَ گوں مردماں لوٹ کرتگ ءُ گوشتگ کہ مردم بیا اَنت ءُ مئے گون ءَ کمک بہ کن اَنت۔
یات بہ بہ اِت کہ زور بیگواھیں نئیم رھمت ءِ کھول ءَ آئید ءِ بنداتی روچ ءَ پہ آئی آجوئی ءَ زھرشانی بندات کرتگ کہ اے زھرشانی نندانک انگت برجاہ اِنت۔
