شال: بیگواھیں بلوچانی توار ( وی بی ایم پی ) ءِ کارگشاد سمی دین ءَ پاکستانی رسانکدر جیو نیوز ءَ گوں اھوالکار ھامد میر ءَ گلگدارے ءَ آئید ءِ روچ ءَ زھرشانیانی بارو ءَ جست ءِ پسو ءَ گوشتگ کہ گوستگیں پانزہ سال اِنت مئے آئید دگانی سر ءَ گوں زھرشانیاں گوزگ ءَ اَنت انوں من ءُ منی کھول ءِ مردماں یاد ھم نہ اِنت کہ آئید چی یے ءُ آئید ءَ چون شادمانی کن اَنت۔
آئی ءَ گوشتگ کہ ھمک آئیداں، کسانیں آئید بہ بیت یا مزنیں آئید چہ ایشی ءَ ابید درسیں شادمانی روچاں مئے زندمان ءَ ھچ وڑیں وشی نیست۔ تیوک ءَ آئید ءِ روچ بنت انچوش کہ مئے واجھیں پت مئے کر ءَ بوتگ اے روچ ءَ آئی مارا گوں وت برتگ ترّ ءُ گرد کرتگ، گوں آئی ءَ مئے بازیں وشی ءُ یات بندوک اَنت۔ وھدے کہ اے روچ کیت گڑا مارا گیشتر آزار دنت۔
سمی دین ءَ گوشتگ کہ ما ھمک آئید ءَ زور بیگواھیں مردمانی کھول یکے دومی ءِ دلبڈی دیگ ءُ پہ وتی آزارانی درشان کنگ ءَ دگانی سر ءَ درکپ ایں۔ اے درچ چہ 2009 ءَ آئید ءِ روچ ءَ ماما کدیر ءِ گدان شال ءَ بندات بوتگ اے انگت ءَ برجاہ اِنت، انوں شال ءُ کراچی ءَ ھوار تیوگیں بلوچستان ءُ پاکستان ءِ جتائیں شھراں آئید ءِ روچ ءَ زور بیگواھیں مردمانی کھولانی نیمگ ءَ زھرشانی کنگ بیت۔
آئی ءَ گوشتگ کہ ما چہ درسیں شادمانیاں زبھر کنگ بوتگ ایں۔ چہ مئے گساں نہ تیوک ءَ یک مردمے بیگواہ کنگ بوتگ، بلکیں اچما مئے زندگی، تاھیر ءُ کرار، واب ءُ باندات گوں آیاں ھمگرنچ اَنت درس اچما پلگ بوتگ اَنت۔ ھما رنج مارا لاچار کن اَنت کہ مادگانی سر ءَ درکپ ایں۔ ما آئیدانی روچاں وتی رنجاں جھان، میان استمانی ادارہ ءُ مردمی ھکامی کارکنانی پیش دارگ ءَ دگانی سر ءَ درکپ ایں۔
سمی دین ءَ گوشتگ کہ مئے مرچی ھم لوٹ ھمیش اِنت اگاں مئے مردماں چے میار کرتگ آیاں دیم ءَ بیار ءُ وتی زنداناں بندیگ بہ کن، اگاں مئے مردم مرچی ھمے زنداناں بوتین اَنت ما سرپد بوتیں کہ آ گوں کجام جاوراں دیمپان اَنت۔ ما آئیداں پہ وتی مردماں گد ءُ چمپل برتگ اَت ءُ دیدار کرتگ اَت۔
